Голосник

Подaрунок для радия ЛЕМ.фм і Руской Бурсы

0

13. мая 2018 р. писменник Адам Барна передал радию ЛЕМ.фм і бібліотеці Руской Бурсы як дарунок книжкы свого авторства. Опечатал іх і дедикацийом. Одтепер будут они доступны про каждого в бурсяній бібліотеці.

Адам Барна дарувал три книжкы, котры выдал як автор або спілавтор. До бібліотекы Руской Бурсы трафили публикациі присвячены істориі Лемковины. На рукы редактора ЛЕМ.фм, С. Косовского, передал свою авторску книжку «Хмары і Сонце над Лемковином», будучу описом істориі Лемковины од найстаршых часів по днес. Дарувал тіж дві книжкы, котрых є спілавтором. Першу написал довєна з о. Андрийом Квоком, є то моноґрафія лемківскых сел Ізбы і Білична, друга то неоцінена історична праца про лемківскых «добровольців», вояків і партизантів, якы бороли ся такой на вшыткых фронтах ІІ світойой войны, мат она наголовок «Лемкы в борбі за свою і не свою свободу» і была написана вєдно з Федором Ґочом.

Передаючы дарунок, писменник з сердечністю выявил, чом як раз має такє желаня. Повіл, што його книжкы все были писаны з великом пошаном до Лемковины. Дарує іх бібліотеці, прото што хоче, жебы дотерли до люди, якы надходят. Зазначыл при тым, што його поколіня уж помалы одходит, а памят і правда про нелегку лемківску історию повинна быти знана і наступным ґенерациям.

А. Барна вродил ся 25. листопада/новембра 1926 р. в селі Чорне (пов. Ґорлиці). Під конец ІІ світовой войны был вербуваний як «доброволец» бороти ся в шорах Червеной Арміі. По повороті з войны, 10. червця/юнія 1947 р., был вєдно зо свойом фамелийом выгнаний на західні землі Польщы (оселил ся в околицях Хобєні). Ціле своє дозріле жытя присвячат церкви, будучы перше дяком в парохіі в Рудній, а пак, по днес в Ліґници. Печатал парудесят публикаций тыкаючых лемківскых і церковных тем. Його творы то не лем історичны опрацуваня, але тіж оповіданя і спомины. Автор кінчыт як раз свою остатню книжку, літопис православной парохіі Воскресіня Христового в Ліґници, котра присвячена є 70. річници ериґуваня парохіі (1948-2018 рр.).

Сердечні дякуєме за дарункы. Желаме многых літ жытя і вельо сил ґу творчій працы на хосен лемківской культуры!

Шеруй.

О авторі

Севериян Косовскый

Народжений на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Актуальні веде веселий, дискотековий проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментар