Голосник

Сумар дня на 12. серпня/авґуста 2019 р.

Приносиме Вам сумар медияльной ґрупы ЛЕМ.фм на ден 12. серпня/авґуста 2019 р.

Піше поломництво на праздник св. Максима Ґорлицкого

Братство Православной Молодежы Перемышльско-Ґорлицкой Єпархіі просит на піше поломництво на праздник св. Максима Ґорлицкого. Поломництво буде выходило зо Ждыні в передден воспоминаня священномученика Максима, 5. вересня/септембра, а скінчыт ся в Ґорлицях, де находят ся мощы святого. Буде то друга едиция того поломництва. Траса о долгости 26 км буде розложена на єден ден. Подібні як влони, поломникы стрітят ся в Ждыни, де о 5.00 год. в церкви Покровы Пресвятой Богородиці зачне ся Свята Літургія. До ціли, котром являт ся катедральна церков Святой Тройці в Ґорлицях, будуча памятником мученичой смерти святого, заплянувано прихід на 16.00 год. Там одбудут ся богослужыня – Всеночна в передден свята і Божеска Літургія в ден праздника на памят святого, т.є. 6. вересня/септембра. Поломництву проводил буде о. ігумен Пафнутий. Вшыткы охочы прошены сут зголошати ся до 31. серпня/авґуста т.р. Орґанізаторы просят о скоршу інформацию од осіб, котрым буде потрібный нічліг. Вписова складка, котра обнимат убезпечыня і выжывліня, то 10 зл.


Пікнік в Высовій в наступный вікенд

Вчера, 11. серпня/авґуста т.р., в Высовій проходил ювілей формального 60-літя місцевого курорту в виді фірмы «Высова С.А.» і 70-літя натуральной мінеральной воды «Высовянка», а тепер рыхтуваны сут уж дальшы акциі. Подія пн. «Высова – пахнуча зільом» пройде 17. і 18. серпня/авґуста. Орґанізаторы зрыхтували богатый проґрам. Пікнік одкрытый буде в суботу о 16.00 год. Буде конкурс на вінок з зіля, прелекция о зілях з лук з Высовой, выступлят м.ін. Ґалицийскій Хор з Высовой та Кабарет «СІМ» з Устя Руского, а забаву заграт ґрупа Рояль Бенд. В неділю, окрем вельох ансамблів, серед котрых выступит і польско-лемківскій хор Роса з Устя Руского, будут такы атракциі як прелекция о апітерапіі. Окрем того, буде мож видіти ремісничы выробы, а не бракне тіж забав для діти.

Шеруй.

О авторі

Наталія Клинковска

Коментарі