Сумар дня 26. квітня/апріля 2024 р

Приносиме вам сумар медияльной ґрупы ЛЕМ.фм+ на ден 26. квітня/апріля 2024 р.

Загальнолемківскы Упамятніня Траґедиі Талергофу

В минулу суботу 20. квітня/апріля, вчас ювілейного X Конґресу Стоваришыня Лемків, делеґаты приняли резолюцию в справі 110. річниці Загальнолемківскых Упамятнінь Траґедиі Талергофу (1914 р.). О детальным проґрамі Стоваришыня Лемків, якє хоче жебы упамятніня мали загальнолемківскій характер, буде іщы інформувало. Основом буде м.ін. поломництво до Талергофу, жебы поклонити ся в місци страданя нашых предків. Полну реляцию з Х Конґресу, якій ся зышол з 35. річницьом істнуваня той першой повыселенчой лемківской орґанізациі, найдете на нашым портали.

Вмерла Ольга Ґлосікова

З жальом інформуєме, што в середу 24. квітня/апріля в віку 71 років вмерла Ольга Ґлосікова, перша директорка Словацкого Нацийонального Музею – Музею Русиньской Культуры в Пряшові. Была родачком з русиньского села Камюнка, старолюбовняньского окресу. На посаді директоркы русиньского музею была в роках 2007-2019. Інституцию будувала од фундаменту, під єй ведіньом музей был одкрытый про публику в 2008 р. В 2011 р. подарило єй ся здобыти про музей нову будову. Ольга Ґлосікова вступила з музейом в 2012 р. до Округлого Стола Русинів Словациі. В часі свого діяня па посаді директоркы подарило ся ій выбудувати першы постійны експозициі музею і зачати полнити збірковы фонды. Про жытя і науковы осягніня бл.п. Ольгы Ґлосіковой прочытате в дописі на нашым портали. Вічна памят!

Майовый вікенд в Сухій Ґурній

В середу 1. мая ґміна Польковиці просит до Сухой Ґурной. Долгій майовый вікенд зачне ся звиджаньом Палацу і Ізбы Памяти – Социяльного Архіву з провідником. Одремонтуваный будинок был офіцияльно одкрытый кінцьом марця тр. Заряджат ним Центр Культуры в Польковицях. В рамках нового проєкту Центра, в палаци возникат Реґіональна Ізба Памяти. Сут там громаджены памяткы, артефакты, фотоґрафіі і істориі передаваны жытелями ґміны, для сохраніня і упамятніня дідовизны реґіону. По звиджаню палацу буде мож зайти до «музичной зоны», та скорыстати з атракций для діти.

PKL завершыт технічны перегляды желізниц 

Од неділі туристы будут мочы корыстати з ґондолі на Креницку Яворину і кабельно-тереновой желізниці на Паркову Гору в Креници. Заран, в суботу 26. квітня/апріля завершат ся технічны перегляды Польскых Кабельных Желізниц (PKL) по зимовым сезоні. Сервісовы працы проходят традицийно двараз в році і вяже ся то з часовым вылучыньом желізниц з хоснуваня. Разом з одкрытьом колейок рушат і другы атракциі доступны в літнім сезоні.

Варштаты батканя яєц в Рускій Бурсі

Припоминаме, што уж позаране, 28. квітня/апріля, в Квітну Неділю за старым календарьом, в Рускій Бурсі в Ґорлицях одбудут ся варштаты батканя яєц. Занятя зачнут ся о 15.00 год. Вступне дармо. Забезпечаме тіж материялы – будут на Вас чекати: зварены яйця, фарбы і воск до малюваня. То чергова подія, котра проходит в рамках Творчой Бібліотекы – циклю стріч для діти і молодежы, вчас котрых рыхтуваны будут розмаіты ручной роботы артефакты. Сердечно просиме!