Голосник

Сумар дня на 5. вересня/септембра 2019 р.

Приносиме Вам сумар медияльной ґрупы ЛЕМ.фм на ден 5. вересня/септембра 2019 р.

В Керестурі будут святкувати 100. річницю РНПО

В понедільок, 9. вересня/септембра, в Новым Саді одбудут ся святкуваня сотной річниці основаня Русиньского Нацийонального Просвітнього Общества – першой орґанізациі, котра забезпечувала культурны і освітовы інтересы войводиньксых Русинів. Орґанізатором торжества є Завод за культуру войводиньскых Русинів. Орґанізаторы хотят в проґрамі не лем Русинам, но і шыршій публиці запрезентувати як вызначным было просвітнє общество, зване так само Просвіта в культурным формуваню і розвитку бачваньско-сримскых Русинів. Участникы ювілею будут мочы дознати ся о ріжных аспектах роботы общества. О тых темах будут бесідувати професоры Янко Рамач і Дюра Гарди і публицисты Дюра Латяк і Михал Рамач. Приготовлена єст і выстава архівных документів і репродукций, котры сут повязаны з діяльністю просвітнього общества. В тот ден одбуде ся так само презентация книжкы Дюры Латяка, котра є посвячена як раз темі той орґанізациі. Русиньскє народне просвітнє общество было основане в 1919 році, коли зышло ся 150 Русинів з Войводины і Сриму в Новым Саді, цілю публикувати і пошырювати книжкы, брошуры ци ґазеты на народным языку – по русиньскы. Більше з істориі общества найдете на нашым інформацийным портали.

Торжества в Пжемкові

В найблизшу суботу, 7. вересня/септембра, в Пшемкові на Нижнім Шлеску пройдут ювілейны торжества повязаны з 70. річницьом ериґуваня місцевой православной парохіі і 40. річницьом служыня місцевого священника як раз серед Лемків в Пшемкові. [20190902_o_Ihor_Popowycz_Pszemkiw_1], бесідує отец Ігор Попович, пшемківскій настоятель. Торжественны богослужыня зачнут ся о 9.30 год. од привитаня архієпископа Юрия. [20190902_o_Ihor_Popowycz_Pszemkiw_2]. По Божескій Літургіі служеный буде молебен, а пак одбуде ся посвячыня пропамятного креста на памятку 70-літя ериґуваня православной парохіі. Парохія св. Михала Арxангела была основана два рокы по акциі «Вісла». Першым парохом был о. Віктор Масік, а вірныма выселены Русины з Лемковины. Належыт до зеленогірского деканату і єст єдном з найбільшых в тій части Польщы. [20190902_o_Ihor_Popowycz_Pszemkiw_3].

Друга едиция ХыжоГраня в Кривій

Так само в найблизшу суботу, в Кривій бл. Ґладышова пройде ІІ ХыжоГраня. На тоту музичну подію просит місцева арґротуристика – Хыжа Гані. В липци/юлию т.р. прошла подібна подія – ЛемкоГраня, а перше ХыжоГраня точно влони. Так як попередньо, буде мож почути традицийны, але і заскакуючы звукы. Окрем артистів, якы заграют польскы творы, але тіж росийскы, лемківскы мотивы переплітати будут ся завдякы выступови дуету Ганця і Славко, котры в репертуарі мают так ностальґічны лемківскы балады, як і скочны традицийны співанкы. Детальный проґрам глядайте на фейсбуковым фанпейджы орґанізатора. Імпреза зачне ся о 15.00 год. Вступне дармо.

Іван Медєші серед фіналистів словацкой престіжной літературной преміі Anasoft Litera 2019

Русиньскый писатель Іван Медєші з Сербіі находит ся медже пятьома фіналистами словацкой престіжной літературной преміі Anasoft Litera 2019. Aвтор до оцініня достал ся завдякы книжці Jedenіe (Єдзенє – Іджыня). Книжка є в дотеперішній діяльности выдавництва Valal вынятком. Рукопис книжкы автор ниґда не выдал в Сербіі по русиньскы. Свій твір дал выдавництву Valal, котре веде Марош Вольовар, якій збірку оповідань переложыл на словацкій язык – сама книжка вышла в 2018 році. Книжка по выданях на Словациі і в Чешскій Республиці выкликала позитивны реакциі. Медєші, котрый дотля знаный был головно войводиньскым Русинам, з дня на ден стал ся писательскым обявліньом для шыршой публикы. Автор, родженый в 1982 році в Вербасі, не належыт до типовых русиньскых писателів, котрый бы писал о любови до народу і землі. Єст оціняный як enfant terrible русиньской літературы. Його тексты сут полны алькоголю, наркотиків, чорного гумору, невыбераных слів і фрустраций. Єдночасно автор на фоні того вшыткого розкрыват траґізм жытя. Лавреат тогорічной літературной преміі, котрый здобуде 10.000 евро, буде выголошеный 18. вересня/септембра о 19.00 год. в Містецкым Театрі Павла Орсаґа Гвєздослава в Братиславі. Надієме ся, што недодолга явит ся тлумачыня і в русиньскым языку.

Netflix бере ся за Варголя

Netflix, єдна з найбільше знаных інтернетовых плятформ до обзераня фільмів і сериялів, рыхтує як раз новый 10-одтинковый серияль о Енді Варголи. За продукцию сериі одповідат Раян Марфі (Ryan Murphy). На тот момент неє іщы знана дата премєры, но фільм подля думкодавців має напевно представляти Варголя як правдивого чловека, котрого творчіст змінила жытя люди. Кєд лем серия буде зреалізувана, одраз явит ся доступна для хоснувателів Нетфлікса.

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Контакт: natalia@lem.fm

Коментарі