Голосник

Світовый конґрес Русинів вертать ся на Словакію. Одсвяткують і День Русинів

В днях 4-го аж 7-го юла 2019-го року буде в Любовняньскых купелях проходити 15-ый Світовый конґрес Русинів. Конґрес ся вертать на Словакію по довгых роках.

1-ый Світовый конґрес Русинів проходив у 1991-ім році в Меджілабірцях (втогды іщі Чехословакія), другый раз орґанізовали Русины на Словакії конґрес у 2003-ім році в Пряшові. По 16-ох роках делеґації зо Словакії, Польщі, Україны, Мадярьска, Румунії, Чеськой републікы, Сербії, Хорватії і Северной Америкы (Канада і Споєны штаты Америкы) знова будуть засідати на Пряшівщіні.

Два дні пленарных засідань

Делеґаты конґресу, кажда членьска держава має по десять делеґатів, зачнуть сходити ся до Любовняньскых купелів уже в четверь 4-го юла. В тот день є на вечур наплановане іщі остатнє засіданя Світовой рады Русинів, котра є выконным орґаном Світового конґресу Русинів у меджіконґресовім дворочнім періоді.

В Світовій раді має кажда членьска держава свого представителя, на чолі стоїть председа, котрый є єдночасно і председом конґресу. Председу од 14-го Світового конґресу Русинів, котрый проходив у Хорватії, выберають прямо делеґаты. Уж другый свій мандат председы теперь закінчує Штефан Лявинець із Мадярьска.

Три пленарны засіданя Світового конґресу Русинів суть напланованы на пятніцю і суботу. В пятніцю зачінать перше засіданя о 9.00 год., в рамках котрого буде і святочне одкрытя конґресу зо запрошеныма гостями. В пополідняйшых годинах будуть проходити засіданя окремых комісій Світового конґресу Русинів.

В суботу суть на проґрамі дві пленарны засіданя. Перше од 9.00 год., друге од 14.00 год. Як раз на пополідняйшім засіданю собі делеґаты будуть выберати новый склад Світовой рады Русинів – кажда членьска держава пропонує свого члена, і нового председу рады і Світового конґресу Русинів. За председу ся голосує прямов тайнов вольбов вшыткых участных делеґатів, причім кандідовати може веце особ. Покля в першім колі нихто не здобуде над 50 процент голосів, до другого кола поступають двоми кандідаты з найвеце голосами з першого кола. Хто здобуде векшыну голосів, стає новы председом.

В рамках пленарных засідань членьскы державы оцінюють свою роботу за остані два рокы од посліндього конґресу, так само ся планує робота на період по конґресі. Рішають ся і актуалны проблемы, на котры треба конґресу реаґовати.

В рамках конґресу і День Русинів Словакії

За День Русинів Словакії быв выголошеный і Світовым конґресом Русинів схваленый 12-ый юн. Тота дата є одкликаньом ся на Дні руськой културы, котры проходили на Пряшівщіні в меджівойновім періоді, головно на Дні руськой културы із 1933-го року, коли быв у центрі Пряшова одкрытый Памятник Александра Духновіча.

Кедьже тот рік Русины на Словакії орґанізують Світовый конґрес Русинів, Русиньска оброда на Словеньску як головный орґанізатор вырішыла святковати День Русинів Словакії в рамках конґресу. Святочный проґрам є приготовленый на пятніцьове пополідне в Камюнці.

Проґрам Дня Русинів Словакії зачне ся о 16.30 год. перед Сільскым урядом, де собі участны припомянуть 200-ту річніцю од нардожіня русиньского будителя Александра Павловіча і сторічніцю од приєднаня русиньскых теріторій до складу Чехословакії, што было офіціално потверджене 10-го септембра 1919 на Мірній конференції. Продовжовати ся буде перед містнов церьков, де ся одслужыть панахіда за вшыткых помершых членів Світового конґресу Русинів од його вынику у 1991-ім році.

За тым вже буде слідовати процесія Русинів на амфітеатер Дубне, де буде од 18.00 год. приготовленый богатый културный проґрам. Вступ на святкованя Дня Русинів Словакії є одкрытый про каждого і вступ є вольный. На 21.00 год. є в рамках святкованя напланованый іщі концерт Іґора Куцера, котрый буде співати співанкы матери Енді Варгола – Юлії. КТота подію буде в сканзені під градом в Старій Любовні.

Конґрес підпорив і председа влады

15-ый Світовый конґрес Русинів быв підпореный Фондом на підпору културы народностных меншын. Фінанчну поміч дав так само Уряд влады Словацькой републікы з премєром Петром Пеллеґрінім і Пряшівскый самосправный край, котрогому шефує председа Мілан Маєрьскый.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА


Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі