В селі Уліч мають школу Александра Духновіча

0

В селі Уліч, в окресі Снина, мають од нового школьского рока нову назву школы. Школа, котра служыть про дітей із девятьох сел цілой околіці, теперь несе названя по русиньскім будительови Александрови Духновічови.

Основна школа з матерьсков школов Александра Духовіча –  то нова назва школы в селі Уліч. В пятніцю, 8-го септембра 2017-го року, офіціалный декрет Міністерства школства, наукы, досліджіня і шпорту Словацькой републікы о запожычіню той честной назвы в Улічі передав директорці школы Яні Кочановой Петро Крайняк, державный секретарь резорту школства. Як Крайняк інформовав, з думков, жебы школа была названа по русиньскім будительови, пришов його патрійный колеґа з партії Most-Híd Йосиф Чокина, родак із сусіднього села Уліч-Криве. Уліч-Криве є єдным із тых сел, котрого діти доходжають до школы в Улічу.

Святочна академія і одкрытя таблы

Із нагоды переданя офіціалного документу під веджіньом директоркы школы Яны Кочановой была приготовлена святочна академія, на котрій выступали школярі. В рамках проґраму діти заспівали русиньскы народны співанкы і декламовали русиньскы стихы. Не браковало Духновічово Вручаніє, котрого текст „Я Русин был есмь и буду…,“ є єдночасно і текстом офіціалной гімны Русинів, приятой Світовым конґресом Русинів.

На академії брав участь і староста села Уліч Ян Голинка, котрый як зряджователь школы быв підпорьовательом думкы, жебы школа мала честне названя по Духновічови. Не быв єдиным старостом на святочній події. Торжество вєдно із Улічанами одсвятковали і старостове сел Овщества сел мікрореґіону Улічской долины (SOMUD – spoločenstvo obcí mikroregiónu Uličskej doliny), до котрого належать окрім Уліча і села Збой, Уліч-Криве, Руськый Потік, Ковбасів, Тополя, Рунина і Прислоп.

По святочній академії была одкрыта і памятна табла на будові школы. Табла присвячена Духновічови є подобна тій, котра была зроблена до кріпты під пряшівскым Катедралным собором св. Йоана Крестителя, де є Духновіч похороненый.

Єдина повноорґанізована школа в долині

Міністерство о запожычіню честной назвы вырішовало іщі попередній школьскый рік. Декрет о назві підписав іщі міністер Петер Плавчан, номінант Словацькой націоналной партії, котрый у своїй функції на натиск премєра Роберта Фіца скінчів ку кінцю авґуста.

Основна школа з матерьсков школов Александра Духновіча в Улічу є єдинов повноорґанізованов школов в Улічскій долині. До школы ходять окрім домашніх і діти із сел Рунина, Ковбасів, Руськый Потік, Уліч-Криве, зо Збоя, Новиселиці і зо села Тополя, котре є родиском Александра Духновіча.

„Запожычіньом честной назвы школа завязує ся пестити традіції, вартости і прінціпы повязаны із особностьов Александра Духновіча.  Є то так само моралным оцініньом резултатів роботы колектіву педаґоґічных і непедаґоґічных робітників і школярів школы,“ написав Петро Крайняк на своїм профілі на соціалній сіті Faceboоk.

Кількость школярів знижує ся

Напрік тому, же школа є єдинов в цілій долині, мусить войовати о каждого єдного школяря. „В школі дотеперь учіть ся в девятьох класах, но знижованьом кількости школярів школі грозить злучованя клас,“ пише ся на офіціалнім сайті школы.

Рішіньом як затрактівнити школу бы могло быти і навчаня русиньского языка. Як інформовав державный секретарь Міністерства школства, наукы, досліджіня і шпорту Словацькой републікы Петро Крайняк, почас святочной події обговорив з директорков школы Янов Кочановов і тему запроваджіня в наступных школьскых роках навчаня русиньского языка на школі. Школа бы так зістала зо словацькым навчалным языком, но діти бы мали можливость учіти ся і русиньскый язык в рамках реґуларного навчалного процесу.

Моментано в Улічу діють Вечурны школы русиньского языка про дітей і дорослых, котры орґанізує обчаньске здружіня Колысочка – Kolíska із Пряшова.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Поділь ся.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Лиш коментар

Zrealizowano dzięki dotacji Ministra Spraw Wewnętrznych i Administracji.
© Copyright by лем.fm. 2017. Вшыткы права застережены.