1% Твойого податку – нич Тя не коштує, а помагат другым!

Як каждий рік, стартуєме з інформацийном акцийом о особах і інституциях, котрым можеме передати 1% свойого податку при обовязковым складаню до Скарбового Уряду податковых декляраций за 2015 рік. Обовязок тот для більшости податників в Польщы треба выполнити до 2. мая 2016 р.

Така форма помочы нич нас не коштує, понеже єст лем вказаньом, на яку конкретну ціль має быти передана част нашого податку, котру і так мусиме заплатити. Часом 1% нашого податку то пару, може парунадцет злотых, але кєд помножыме іх через десят, пятдесят, сто, або тисяч осіб, котры вказуют ону конкретну ціль, выходят з того сумы, могучо влияючы на орґанізациі, котрым передаваны сут декляруваны податниками грошы. Тым способом, в цілій Польщы каждий рік передаваных єст ачий більше як 500 мілийонів злотых.

Грошы передаваны сут лем Орґанізациям Соспільного Хосну (поль. Organizacja Pożytku Publicznego, анґ. Public Benefit Organization), до котрых можут зголосити ся вшыткы потрібуючы фінансовой помочы. Полну листу такых орґанізаций мож найти в офіцияльным реґістрі (напр. за тым мотузком).

Присланы ґу нам анонсы завішaме поправо на головній стороні нашого порталю (можете одраз войти, клікаючы на тот мотузок). Схоснуйте в своіх податковых деклярациях за 2015 номер KRS та впиште ціль, на яку передаєте 1% податку. Запрашаме вшыткых, котры хотят долучыти на тій стороні свій анонс – присылайте оголошыня на адрес radio@lem.fm. Очывидно – передавайте тоту відоміст другым і завішайте на своіх фейсбуках, твітерах і інчых місцях. І тым можете помочы!