150 років од народжіня владыкы Нярадія одсвятковали в Руськім Керестурі і Новім Саді

В октобрі того року минуло 150 років од народжіня ґрекокатолицького єпіскопа, крижевацького єпархы Діонізія Нярадія (рр. 1974 – 1940). Святкованя округлой річніці проходили в Руськім Керестурі і в Новім Саді почас вікенду, 30-го новембра і 1-го децембра 2024-го року.

Владыка Дінозій быв у першій половині 20-го столітя вызначнов особностьов про ґрекокатоликів. У 1922-ім році Святішый Престол призначів го за апостольского адміністратора Пряшівской єпархії. В тім самім часі вів паралелно і свою Крижевацьку єпархію, а то аж до 1927-го року. В роках 1938 аж 1939, штири місяці, быв іщі апостольскым адміністратором в Хусті. То быв резултат окупації части Підкарпатьской Руси Мадярьском.

І вдяка тым фактам на святкованя до Сербії прияли позваня представителі ґрекокатоликів із Словакії, Підкарпатя, Польщі, Хорватії і Македонії.

В суботу 30-го новембра святкованя почали дополідне в Катедралнім соборі святого Николая в Руськім Керестурі архієрейсков літурґійов, котру служыв домашній єпарха – кір Ґеорґій Джуджар.

Вєдно з ним служыли апостольскый нунцій в Сербії Санто Рокко Ґанджемі, архієпіскоп Кіріл Василь – кошыцькый єпарха, кір Мілан Лах – братіславскый помічный єпіскоп і апостольскый візітатор про ґрекокатоликів у западній Европі, і владыка Кіро Стоянов – єпархіалный єпіскоп Струміце-Скопє в Македонії. Своїх делеґатів на святкованя послали і Пряшівска архієпархія, Мукачовска єпархія і Крижевацька єпархія.

По літурґії наслідовала молитва панахіды за владыку Діонізія, а так само участны пішли до кріпты, де суть уложены остаткы єпіскопа.

Пополідне в душпастырьскім центрі єпархії одбыв ся Меджінародный науковый сімпозій „Владыка Діонізій Няраді: жывот і діло“, на котрім окрім домашніх реферуючіх выступали і фаховці з Польщі, Хорватії, Македонії і Словакії.

В неділю проґрам продовжовав в Новім Саді. В Конкатедралнім храмі свв. апостолів Петра і Павла єпіскопи дополідне служыли архієрейску літурґію. В пополідняйшых годинах продовжовав сімпозій, котрый другый день проходив в просторах будовы Заводу про културу войводиньскых Русинів.