Голосник

70 років православной парохіі в Мальчыцях

Того рока минуло 70 років од покликаня православной парохіі Благовіщыня Пресвятой Богородиці в Мальчыцях на Нижнім Шлеску. То єдна з вельох парохій на чужыні, котру в більшости творят потомны выселеных 1947 р. Лемків.

Свято зышло ся з ювілейом 35-літя парохуваня в Мальчыцях о. митр. Михала Шляґы. Торжественну літургію очелил владыка вроцлавско-щеціньской єпархіі, Юрий.

Подвійный праздник

Ювілейны празднуваня проходили 27. червця/юнія 2020 р. Окрем архієпископа Юрия в богослужыню взяло участ вельох священників і вірны з сусідніх парохій. Присутны были тіж духовны отці римокатолицкого Костела і представникы локальных самоурядовых власти, в тым війт ґміны Мальчыці Пьотр Франковскій, староста середского повіту Кжыштоф Шаланкєвич та бывшый маршалок нижньошлезского воєвідства Тадеуш Самборскій.

По літургіі, парохіяне вєдно з о. Шляґом отримали ґратуляциі і подякуваня за долголітню діяльніст і розвиток православной церкви в Мальчыцях. Подякуваня передавал заєдно владыка Юрий, як і чысленно згромаджены гості. Вчас богослужыня владыка передал двом духовным отцям єпархіяльны нагороды, о. Фомі Мендрицкому і діяконови Дарийови Макухови.

Наслідство акциі Вісла

Православна парохія Благовіщыня Пресвятой Богородиці в Мальчыцях была покликана для выселеных на західні землі Польщы православных вірных, в тым в більшости Лемків, Русинів в 1947 році в рамках акциі Вісла.

Парохія была офіцийно ериґувана 24. мая 1950, коли по долгых старанях Уряд до справ вызнань передал мальчыцкій православній громаді поєвангелицку святыню. Неофіцийно, першы літургіі одбывали ся уж од 1949 рока.

В роках 1953-1954 святыня остала пристосувана до вымогів православной літургіі. Іконостас был привезеный з церкви св. Михала Архангела в Кульній (Люблинщына). Од 35. років парохом мальчыцкой церкви єст о. митр. Михал Шляґа. Парафіяльны книгы сут ведены од 1961 рока. Парохія чыслит бл. 50 родин. To єдна з 45 парохій вроцлавско-щеціньской єпархіі.

Перед пятьома роками было так само святкуване 65-літя істнуваня парохіі. Товды была одркыта принагідна таблиця, на котрій находит ся м.ін. напис: Лемковино, і ту твоі діти.

фот. diecezjawroclawsko-szczecinska.pl

Шеруй.

О авторі

Севериян Косовскiй

Народженый на чужыні. Матуриста з лемківского языка. Завершыл юридичный факультет Вроцлавского Університету. Окрем того што гев, час-до-часу дописує до часопису Бесіда. Головный редактор Лемківского Річника. Любитель давной Лемковины. Годен годинами слуxати про втрачене лемківскє щестя. Контакт: seweryjan@lem.fm

Коментарі