75 років од Sonderaktion Krakau

(на знимці Ягайлоньскій Університет в Кракові)

Рівно 75 років тому в Кракові арештувано 184. професорів і науковців з польскых університетів. Серед ных был Русин, вроджений в Заричові на Підкарпатскій Руси, учытель мадярского языка на Ягайлоньскым університеті – др Іван Гарайда – языкознавця і автор “Грамматикы Руського Языка”.

Арештуваны професоры были зосланы до концтабору Заксенхаузен недалеко Берлина. Лем некотры были през гітлеровців одраз звільнены з арешту (были медже нима вшыткы украіньскы науковці).

Вельо вызначных професорів не пережыло концтабора. Іван Гарайда был выреклямуваний през мадярскій уряд і на яр 1940 рока звільнений. Выіхал на Підкарпатску Русь. Там был учытельом в Ужгороді. В 1944 році арештуваний і вбитий през НКВД в ужгородскій вязници за “профашыстовску” діялніст.

Про спільне увязніня з професором Гарайдом писали медже інчыма польскы професоры Я. Ґвяздоморскій во “Споминах з Заксенхаузен”, Р. Правохеньскій – “З університету до пекла” і С. Урбаньчык – “Університет за колючым дротом”.