«Лемківска осін» – іщы єден конкурс для діти

Приносиме Вам віст про черговый конкурс для діти (iнформацию про першый найдете в тым місци). «Лемківска осін» то нагода для молодшых і кус старшых школярів вказати свій плястичный талант. В конкурсі можут взяти участ діти од 4 до 14 рока жытя, працы приниманы сут в 4 віковых катеґориях.

«Лемкіска осін» то ініциятива, думкодавчыньом і головном координаторком котрой є учытелька лемківского языка Дорота Максимчак, яка веде занятя з того предмету в школі в Радваницях на заході Польщы. Шкільно-Предшкільный Комплекс в Радваницях єст як раз орґанізатором реченого конкурсу.

Моє уявліня про осін на Лемковині

Як мож чытати в реґуляміні акциі: «цілю конкурсу є підтримувати культурову достоменніст та популяризувати знаня про природу, традициі і історию Лемків». Плястичны роботы мож выконувати довільном техніком, в форматі А3 або А4. Іх тема то свобідна інтерпретация автора про осін на Лемковині. Конкурсову роботу треба одповідньо описати (інформацию, як тото зробити, найдете в реґуляміні за тым мотузком, a карту зголошыня найдете гев) та выслати на адрес радваницкой школы до кінця листопада/новембра. Оголошыня результатів пройде 15. грудня/децембра тр.

Для трійкы лавреатів в каждій з катеґорий (І кат.: діти в віку 4-6 років, ІІ кат.: клясы І-ІІI, ІІІ кат.: клясы ІV-VІ, ІV кат.: клясы VІІ-VІІІ) предвиджены сут предметовы нагороды, окрем того каждый з участників достане грамоту і дрібну нагороду.

Колядуваня, малюваня ікон

Конкурс проходит в рамках «Тот світ не загынул – будут называти нас Лемками», котрого реалізация зачала ся в вересни/септембрі тр. «Хочеме вказати нашым дітям, як важне є плеканя культуровой спадковины предків, жебы наш світ николи не загынул і все называли нас Лемками» – бесідує Д. Максимчак, координаторка.

В проґрамі проєкту є іщы вечер коляд з участю школярів з Радваниц і Бучыны, з хорами обох парохій – католицкой і православной, будут прошены тіж ансамблі: Ластівочка з Пшемкова і народный ансамбль Своякы з Радваниц. На марец 2021 рока заплянуваны сут варштаты писаня ікон, для вышктых охочых з ґміны Радваниці.

Проєкт фінансує Фонд Орлен з проґраму «Моє місце на земли».