В Любіні одзначыли Ден Русинів

Ден Русинів Польщы, якій припадат каждого рока на 5. грудня/децембра, є святкуваный не лем на рідній земли, але і всядиль там, де являт ся внутрішня потреба люди.

Так тіж – што уж є традицийом – члены Стоваришыня Лемків подали ся делеґацийом на любіньскій цмонтір, де оддали чест двом членам орґанізациі – бл. п. Богданови Ґамбальови (1965-2020) і бл. п. Янушови Квоці (1970-2024).

То як раз покійный Богдан Ґамбаль был перед роками єдным з думкодавців і орґанізаторів Нацийонального Свята Лемків – што все одбывало ся реализуваньом культурного проґраму в просторах ґорлицкой Руской Бурсы.

Члены Стоваришыня Лемків пришли на любіньскій цмонтір 4. грудня/децембра – кєд же в тот ден традицийно одзначане єст Свято Копальників. Так тіж были они позбераны в копальняны мундуры. Серед них были копальникы Мариян Шкурат з Кружка СЛ в Любіні і Любомир Горощак з Кружка СЛ в Хоцянові.

Любіньскы члены Стоваришыня Лемків на гріб Покійного Богдана Ґамбаля зачали приходити такой одраз по його несподіваній смерти. Покійный был єдным з членів-основателів Стоваришыня Лемків в 1989 р.

Хвилю пізнійше, бо в 1991 р. стоял при реактивациі ґорлицкой Руской Бурсы, якій посвячал своі пізнійшы рокы. Для лемківской соспільности явил ся вызначным діячом, єдным з думкодавців спільнотовых святкувань, нацийонального свята, основательом першого лемківского радия ЛЕМ.фм.

Кєд влони несподівано одышол Януш Квока, при нагоді Дня Русинів (першыраз в 2024 р.), члены Стоваришыня Лемків рішыли так само заходити на місце його вічного спочываня, і так само оддают чест єдному з членів орґанізациі, якій остал в памяти як особа о вельох плянах і думках на будуче.