Ансамбль Розтока одсвяткувал свій ювілей

При участи власти ґміны, спонсорів, гости репрезентуючых лемківскы соспільны орґанізациі, камаратів з інчых фольклорных ґруп, лемківскій ансамбль Розтока з Рудной шумні святкувал свій ювілей 10-літя концертуваня.

В осередку культуры в Рудній, в суботу, 28. квітня/апріля 2018 р., зышли ся давны і теперішні члены ґрупы, жебы приняти желаня і ґратуляциі, поспоминати і погостити ся з тыма, якы за остатніх 10 років підпорювали і помагали ґрупі успішні ся розвивати. На початку стрічы лідер і кєрівник Розтокы, Володимир Зорило, привитал вшыткых і припомянул, што Лемкы жыют в Рудній од 1947 р., коли то нашли ся там не зо свойой волі, лем в наслідстві акциі «Вісла». Єст тіж символичне, што ювілей ґрупы повязаний єст з річницьом початку депортаций.

Владислав Біґус, війт ґміны, надзвычай сердечні розповідал про Лемків і стараня самоурядовых власти, жебы помочы ініциятивам, якы мают за ціль сохранити і розвивати лемківску культуру, лемківскій фольклор. Зазначыл, што добрі розуміє тугу за втраченом вітчызном, бо, як вельо жытелів ґміны, єст переселенцьом. Векшына населіня пришла зо сходу з бывшого тернопільского воєвідства, але єст вельо тых, котрых діткнула акция «Вісла». Владислав Біґус дал притиск на тото, што за рахунками з Повселюдного Спису Населіня то на обшыри ґміны Рудна найвеце громадян задеклярувало приналежніст до лемківской нацийональности, зато самоурядовы власти чуют ся в обовязку підпорити ініциятивы такы як діяльніст Розтокы.

Кєрівник ґрупы, Володимир Зорило, подякувал вшыткым, якы помогли розвинути діяльніст ансамблю, бывшым членам та тым, што спонсорували ґрупі прекрасны лемківскы кроі і чысленны выізды з концертами, якы все мают на ціли прославляти лемківску музыку і нести рідне слово.

Власти ґміны з нагоды ювілею вручыли дарунок, а пак зачала ся гостина і концертуваня. Наперед на сцені запрезентували ся Розточане, а потім грали і співали інчы ґрупы.