Архієпіскоп Кіріл Василь став папскым делеґатом про Сірійско-малабарьску церьков

Як інформує Пресовый центер Кошыцькой єпархії, кошыцькый єпарха – архієпіскоп Кіріл Василь, быв призначеный папскым делеґатом із особливыма правами про католиків Сірійско-малабарьской церькви в Індії, окремо в Архієпархії Енакулам-Анґамалі.

Вселеньскый Архієрей владыку Кіріла новов посадов повірив у понедільок 31-го юла 2023-го року. Архієпіскоп Кіріл Василь і далше зіставать кошыцькым єпархом.

Проблемы з реформов

Архієпархія Енакулам-Анґамалі в індійскім штаті Керала є позначена дакількорічныма непокоями з боку священиків і віруючіх, котры, окрім іншого, не суть согласны з літурґічнов реформов, пише Пресовый центер Кошыцькой єпархії.

На реформі іщі у 1999-ім році договорив ся Сінод єпіскопів, і была схвалена Папом римскым Франціском. Літурґічна реформа выходить із пожадавкы Другого ватіканьского собору, котра апелує на восточны католицькы церькви, жебы обновити первістны автентічны літурґічны і духовны традіції.

Спор в Сірійско-малабарьскій церькви в Індії є в тім, ці священик має одправляти літурґію обернутый тварьов ку людям або на выход ку престолу. Споминана церьков была в минулости златинізована, і священик служыть обернутый ку людям.

Кількостьов своїх віруючіх, котрых є понад 4 міліоны, є Сірійско-малабарьска церьков другов найвекшов восточнов католицьков церьквов. Єдночасно то найвекша церьков у Індії, котра своє походжіня має од апостола Томы, і заховлює восточно-антіохійску, значіть халдейску літурґічну дідовизну.

Головов церькви од 2011-го року є верьховный архієпіскоп Мор Джордж кардінал Аленхеррі.

Честь і знак довіры

Пресовый центерь Кошыцькой єпархії по призначіню архієпіскопа Кіріла Василя за папского делеґата позвідав ся владыкы, што тото менованя значіть про нього особно, про Кошыцьку єпархію, і про церьков.

Призначіня за папского делеґата владыка обще означів за честь і знак довіры з боку Святішого Отця. Як дале повів, даколи ся выменує делеґат, жебы тота особа репрезентовала Папу римского при даякій церьковній події. Но так само суть сітуації, коли делеґат є повіреный особливыма правами, жебы рішыв конкретну проблему в дакотрій з містных церьквей, і то якраз припад владыкы Кіріла.

„Про Кошыцьку єпархію то значіть, же на даякый час буду мусити ділити свою увагу меджі властну єпархію і потребы Сірійско-малабарьской церькви в Індії,“ повів владыка, котрый вірить, же вдяка добрій команді співпрацовників в Кошыцях буде годен реалізовати тото повіріня Вселеньского Архієрея такым способом, жебы то не огрозило нияк фунґованя Кошыцькой єпархії.

Владыка в найблизшых днях рихтує ся на дакілько тыжднів одыйти до Індії, жебы зробити першу оцінку напруженой сітуації. Припомянув, же Сірійско-малабарьску церьков в минулости навщівив дакілько раз, кедь іщі робив на Конґреґації про восточны церькви.

Владыка думать, же напружену сітуацію не мож рішыти од стола в канцеларії, але посередньицтвом особной скушености, розговорів, оцініня сітуації на місці.

„Аж по тій першій навщіві буду знати ліпше посудити, якы будуть далшы крокы, потрібны на досягненя того ціля,“ закінчів архієпіскоп Кіріл Василь.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА