Бл. п. Архієпископ Адам скінчыл бы днес 90 років

Днес, 14. серпня/авґуста т.р., бл. п. архієпископ Адам скінчыл бы 90 років. Владыці до округлого ювілею бракло такой лем трьох тыжнів. Архіпастыр одышол до Вічности 24. липця/юлия 2016 рoка.

В мирі – Александер Дубец, народил ся 14. серпня/авґуста 1926 рока в селі Фльоринка на західній Лемковині. З рідном земльом на деякій час попращал ся в 1947 році, коли цілу Лемковину насильно выганяно на західні землі Польщы. По богословскых студиях і рукоположыню вернул на Лемковину, де обнял парохію св. Михала в Высові, а пак на Підкарпатю в Кальникові. В січни/януари 1983 р. был хіротонізуваний в сан єпископа, а дальше з дньом 29. вересня/септембра 1983 р. призначений на саноцку катедру реактивуваной по такой 300 роках православной перемышльско-новосандецкой єпархіі. Більше з біоґрафіі – за мотузком.

По чыні похорону, котрий одбыл ся 27. липця/юлия т.р. в Саноку, тіло покійного остало зложене в гробници находячій ся в підземлях православной церкви св. Владиміра в Креници.

З нагоды річниці 90. уродин остал печатаний альбом присвячений жытю владыкы Адама. Редактором тексту є імость Маріянна Яра, а вводне слово написал Петро Трохановскій. Книжка чыслит 300 сторін, в котрій находит ся вельо архівальных фотоґрафій.

Архієпископ Адам был прихыльником фунґуваня лемківскых медий. За його благословіньом радийо ЛЕМ.фм мало нагоду нагрывати вшелеякы церковны свята та подіі. На Різдво в 2015 році владыка склал специяльны желаня для слухачів нашого радия. В єдным з інтервю заохочал слухати рідне слово, котре штоден мож чути в ефірі лемківского радия ЛЕМ.фм.

Долов коротка доповід од бл. п. Владыкы Адама.