Голосник

Ближыт ся выстава контроверсийной Варгольовой творчости. Вкаже ся і книжка з його рисунками

Неодогла в лондоньскым Tate Modern одбуде ся вернісаж выставы, котра вкаже м.ін. долго непубликуваны контроверсийны творы Енді Варголя. Будут то образы, котры представлялют трансексуальны жены, дреґ-квін, а тіж мужчын, в приватных, еротичных моментах.

Окрем выставы рыхтувана єст публикация Майкеля Дейтона Германна під назвом «Andy Warhol: Early Drawings of Love, Sex and Desire», котра містила буде контроверсийны рисункы.

Тема табу

«Заказаны» образы то рисункы представляючы молодых мужчын в приватных, інтимных моментах. Творы походят з 50. років ХХ ст. Скорше не было можливе іх вказати, зато што тема, котром занимал ся Варголь, родила контроверсиі ачий в ліберальній Америці. Коли автор хотіл іх вказувати, стрічал ся з одмовом.

На лондоньскій выставі окрем найбарже популярных творів і рисунків мужчын буде вказувана серия образів трансексуальных жен і дреґ-квін. Варголь намалювал 14 афроамериканьскых і латиноамерикаснькых дреґ-квін та транс-жен до свойой сериі з 1975 р. «Дамы і панове». Серед них была новаторска трансджендерова активістка Марша П. Джонсон, котра была центральном персоном Стоунволлского Бунту в 1969 р. в Ню Йорку, якій спричынил сучасный рух ЛҐБТК. Ґалерия Tate Modern вкаже 25 образів з сериі транс, якы будут ся находити в окремым поміщыню вчас выставы.

Выстава потырват од 12. марця 2020 р. і буде мож ю обзерати до 9. вересня/септембра.

Літом выйде книжка

Літом має вказати ся нова книжка з серийом рисунків представляючых гомосексуальных мужчын. Рисункы тоты творят і част лодньской выставы. Публикация запрезентує соткы такых образів. Вшыткы они были выконаны артистом іщы товды, коли робил як комерцийный ілюстратор, на вельо років перед тым, як зробил своі найвеце доціняны і популярны ґрафікы. Подля автора книжкы, рисункы вказуют емоцийональну безборонніст в спосіб, котрого ани фотоґрафічный апарат не єст в силі зімати.

Подля Фундациі Енді Варголя, в 50. роках ХХ ст., коли гомосексуалізм в Америці был іщы темом табу, пробы презентациі рисунків стрічали ся з гомофобічном одмовом властителів ґалерий в Ню Йорку. В книжці поміщено бесіды з артистами, котры были свідками тамтого творчого періоду Варголя і памятают, як му одказувано. Хоц в Америці сеса тема уж не родит такых емоций, гомофобічны поставы надале ся стрічат в інчых державах світа. Варголь, коли творил заказаны ґрафікы, мусіл конечно ждати на іх скрытя, прото што темы, якыма оперувал, были про люди не до принятя. Подля Майкеля Дейтона Германна, автора «Andy Warhol: Early Drawings of Love, Sex and Desire», уж товды Варголь вказувал свій против неґативным поставам.

фот. The Andy Warhol Foundation for the Visual Arts

Шеруй.

О авторі

Севериян Косовскiй

Народженый на чужыні. Матуриста з лемківского языка. Завершыл юридичный факультет Вроцлавского Університету. Окрем того што гев, час-до-часу дописує до часопису Бесіда. Головный редактор Лемківского Річника. Любитель давной Лемковины. Годен годинами слуxати про втрачене лемківскє щестя. Контакт: seweryjan@lem.fm

Коментарі