Бортне. Кольорова Церков – вернісаж выставы

26. липця в церкви в Бортным буде проходил вернісаж особливой выставы під назвом Бортне. Кольорова Церков, орґанізуваной през Музей Дворы Карвациянів і Ґладышів в Ґорлицях одділ Мазярска Загорода в Лоси з церквом в Бортным.

Выстава то оповіст о старых іконах, котрых в церкви уж неє, о священниках, котры душпастырювали в бортняньскій церкви, а котрых тіж уж неє. То тіж оповіст о кольорах, котрых уж неє. Колиси была то церков з вынятковым, днес неводиочным, вельокольоровым убарвліньом назовни, з цінныма іконами і цікавом історийом. Тепер церков находит ся серед тых найскромнійше выпосаженых лемківскых церкви – більшіст єй ікон, з XVI, XVII i XVIII столітя єст розпорошена по світі.

Выстава лучыт три експозициі посвячены: кольоровій архітектурі, священьскым родам в Бортным, колишнім іконам і символіці іх кольорів. Вернісаж выставы зачне ся о 16.00 год. в грекокатолицкій церкви свв. Космы і Даміана в Бортным.

Єдным з медияльных патронів выставы єст радийо ЛЕМ.фм. Спілорґанізатором выставы єст православна парафія в Бортным та Стоваришыня Розвитку Села Бортне і Бодакы.
Проєкт спілфінансуваний Міністерством Культуры і Народового Дідицтва

Церков свв. Космы і Даміана в Бортным была побудувана в 1842 роц . То орієнтувана церков (олтар звернений єст на схід), тридільна, о деревяній, зрубовій конструкциі. Олтар побудуваний остал на пляні простокута, храм вірных на пляні квадрату. Третя, домінуюча в брылі церкви част, вежа, мат стопову конструкцию і обнимат притвор і західню част бабинця. Над олтарьом і храмом вірных сут шатровы, вкрыти ґонтом дахы, над фраґментом бабинця дах єст полщыновий, двопадистий. Вежа звінчена єст ізбицьом і банястым дахом. Вшыткы три части дахів вінчат привидны світичы з маковицями і кутыма крестами. Ціла церков обита єст ґонтом. В середині находит ся XVIII-вічний бароковий іконостас, а в олтари находит ся різблений, поліхромуваний бічний олтар з 1797 рока.