Буковскый: Голова державы бы ся веце мала занимати народностныма меншынами

Од будучой головы державы, котров по другім колі презідентьскых выборів на Словакії, яке проходило 30-го марца 2019-го, стала Зузана Чапутова, очекує уповномоченый влады Словацькой републікы про народностны меншыны Ласло Буковскый, же ся буде веце занимати вопросами народностных меншын.

Інформовала о тім словацька пресаґентура SITA. Меншынова політіка за словами Буковского належыть ку фундаментам демократічной сістемы.

Є потрібна комунікація з меншынами

„Меншынова політіка є фундаментом демократічной сістемы. Но ку досягненю того цілю є потрібна реґуларна комунікація, але і фаховець в тімі презідента ці презіденткы, котрый бы сістематічно звертав увагу на потребы і проблемы народностных меншын,“ повів про аґентуру уповномоченый.

Буковскый підкреслив, же в минулости не зорґанізовала ся ани єдна стріча презідента із уповномоченым про народностны меншыны. Окрім іншого очекує, же у своїх приговорах і в справі о стані републікы, котру чітать презідент перед парламентом, не забуде нова презідентка припоминати і народностны меншыны.

В кампані ся меншыны рішыли аж перед другым колом

В кампані, котра проходила перед першым колом, презідентьскы кандідати занимали ся різныма темами, но меншынам ся за словами Буковского увага недавала.

„О потребах народностных меншын і етнічных ґруп нич не зазвучало. Як кебы народностны меншыны не мали свої оправданы пожадавкы, подобно як іншы меншыны. Єм радый, же перед другым коло выборів сітуація змінила ся, обидвоми кандідаты підкреслили вклад народностных меншын про Словакію і обіцяли, же будуть веце інтересовати ся їх актуалныма проблемами,“ конштатовав уповномоченый.

Єдночасно вітать, же народностны меншыны, аж на дакотры выняткы, не были неґатівным елементом кампані. „Такзвана мадярьска карта не грала жадну роль. Довгодобым цільом є, жебы на членів народностных меншын не смотрило ся як на чуджінців, але як на рівноправных гражданів Словацькой републікы,“ повів Буковскый.

Чапутова подяковала в языках меншын

На Словакії є вызнаных тринадцять народностных меншын. Меджі штири найвекшы за остатнім переписом населіня, котре проходило у 2011-ім році, належать мадярьска, ромска, русиньска і чеська меншына.

Як раз в тых языках, окрім словацького, подяковала за голосованя на своїм першім бріфінґу по публікованю іщі неофіціалных резултатів в ночі зо суботы на неділю новозволена презідентка Словацькой републікы Зузана Чапутова. Было то першый раз в історії Словакії, же новозволена голова державы дяковала і в языках мешнын. Єднако зробила і на своїм профілі на сіті Facebook по першім колі выборів.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА