Чеськый міністер дістав апелацію односно Русинів

Міністер загранічных діл Чеськой републікы Лубомір Заоралек, член Чеськой партії соціално демократінчой (Česká strana sociálně demokratická),  дістав в тых днях апелацію односно сітуації Русинів на Україні. Під апелаційов суть підписаны двоми Русины – Ян Касіч, предсдеса Містной орґанізації Чеськой партії соціално демократінчой Пардубіці ІІІ, ЮДр. Петр Шада, член Общества приятелів підкарпатьской Руси (Společnost přátel Podkarpatské Rusi), підпредседа Містной орґанізації Чеськой партії соціално демократінчой Платєніце – Боржіце і Мірослав Вернер, так само член общества і председа партії в Дашіцях.

„Обертаме ся на Тебе у справі пожадавок русиньской народности на Україні,“ пише ся в апелації. Підписаны ся звідають міністра, ці знать о тім, же Україна є єдинов державов у світі, котра не вызнавать Русинів як окрему самобытну народность. „Притім Русины творять корінне жытельство Підкарпатьской Руси,“ пишуть далше сіґнатарі.

„Зато тя налігаво жадаме, жебы-сь силов свого уряду і свойой особности причінив ся о сповніня справедливых пожадавок Русинів на Україні… Справа є о то безодкладніша, же жытелі того реґіону (Підкапрпатя, позн. редакції) были нашыма сполугражданами в добі першой републікы і лем під натиском Сталіна была тота область приєднана по Другій світовій войні до СССР,“ продовжують в апелації Заоралковы партійны колеґове. В писмі споминають і іґнорацію референдума із 1991-го року, в котрім ся жытелі Закарпатьской области Україны высловили за то, жебы была область частьов нововыникнутой україньской державы зо статусом автономной области.

„Бізовно то про тебе не буде жадным проблемом, кідь так довго і завзято підтримуєш сучасну київску владу. Наконець собі тя дозволюєме пожадати о інформацію, якы крокы в повязаню з тов нашов апелаційов были прияты,“ закінчує ся писмо міністрови Заоралкови.

Жрідло фотоґрафії: novinky.cz

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА