Члены СКУтНіЕМ вернули до своіх обовязків

Меншынова сторона Спільной Комісиі Уряду та Нацийональных і Етнічных Меншын выдала комунікат, в котрым інформує о рішыню завершыти стан завішыня меншыновой стороны в працах Комісиі. Ци поправит то ситуацию меншын?

В червци/юнію того рока інформували сме, же з дньом 1. червця/юнія тр. част членів СКУтНіЕМ будучых представниками нацийональных і етнічных меншын та соспільности хоснуючых реґіональный язык завісила свою участ в працах Комісиі. Реакция членів СКУтНіЕМ была формом протесту проти введіню переписів дискримінуючых німецку меншыну в квестиі вчыня меншынового языка і браку діянь зо стороны уряду, якы бы змінили тоту ситуацию.

Брак реакций власти

Як пишут в комунікаті, надіяли ся, же так драматичный ґест з іх стороны спричынит рефлексиі над правном дискримінацийом німецкой меншыны і зміну того стану. Дотля єднак такы діяня з урядовой стороны не были підняты.

Зато же діяня меншыновой стороны Комісиі не выкликали практичных результатів, рефлексий і не видно реальной перспективы зміны, рішыли они завершыти свій стан завішыня в працах Комісиі. «То поражка не лем наша, але і цілой Спільной Комісиі, і вдарят в єй авторитет і значыня» – мож прочытати гіркы слова в тексті комунікату.

Незмінно уважают, што переписы дискримінуючы німецку меншыну так само нарушают фундаменты політикы державы взглядом нацийональных і етнічных меншын, яка реализувана єст в Польщы од 1989 р. «До того моменту было для нас очывидне, што політика державы взглядом меншын, хоц вымагала корект, была єднак спійна взглядом вшыткых нацийональных і етнічных меншын» – пише ся в комунікаті.

Дальша дискримінация меншын?

Партия Солідарна Польща хоче піти о крок дальше в дискримінациі німецкой, але і інчых меншын. Як подал на Твітері радный Дариюш Матецкій, партия зложыла проєкт закону, што новелизує Выборчый кодекс.

Посланці сут за тым, жебы органичыти привілегіі німецкой меншыны, кєд іде о можливіст достати ся до Сойму. Актуальны переписы звільняют выборчы комісиі утворены через выборців зосередженых в зареґіструваных орґанізациях нацийональных ци етнічных меншын з обовязку здобыти найменше 5 проц. важні одданых голосів в скали державы вчас браня до увагы списку кандидатів на послів до поділу мандатів.

Як спостерюг Секретар Нацийональных Медий Павел Кубаля в коментари під вписом Матецкого – устава мусит тыкати вшыткых меншын, а не выключні німецкой. Згодил ся з тым ведучый Солідарной Польщы на Помори, Д. Матецкій, і додатково скоментувал, што новелизация закону буде тіж забезпечыньом перед введіньом до польского парляменту за великого чысла послів, што належат до украіньской меншыны.

Проєкт новелизациі Выборчого кодексу представили в пятницю 25. листопада/новембра тр. віцеміністер рільництва і розвитку села Януш Ковальскій та віцеміністер климату і середовиска Ясек Оздоба.

«Піднимати діяня для протидіяня дискримінациі осіб, што належат до меншын»

Згідні з Уставом з дня 6. січня 2005 рока о нацийональных і етнічных меншынах і о реґіональным языку до задач Спільной Комісиі належыт м.ін. выражати опініі в справах реализуваня прав і потреб нацийональных меншын, в тым оцінювати спосіб реализуваня тых прав, ци опініювати проєкты правных актів, што тыкают справ меншын. Завішыня членів Комісиі не давало можливости на якы-небуд діяня і реакциі.

Проєкт новелизациі Выборчого кодексу односит ся безпосередньо до вшыткых меншын в Польщы, хоц подля слів послів Солідарной Польщы іде ім выключні о незгоду на «ситуацию браку симетриі в трактуваню польской меншыны в Німцьох і німецкой меншыны в Польщы».