Члены СКУтНіЕМ завісили спілпрацу з польскым урядом

14 членів меншыновой страны Спільной Комісиі Уряду та Нацийональных і Етнічных Меншын завісило спілпрацу з польскым урядом. Є то голос протесту взглядом діянь міністра едукациі Пшемыслава Чарнка, котрый ограничыл чысло годин вчыня меншынового языка для німецкой соспільности.

1. червця/юнія тр. на LXXVIII засіданю Спільной Комісиі Уряду та Нацийональных і Етнічных Меншын векшіст членів, 14 з 20, репрезентуючых нацийональны і етнічны меншыны та соспільніст хоснуючу реґіональный язык, представила офіцийне становиско, в котрым высловлює своє обуріня і протест взглядом переписів дискримінуючых німецку меншыну. Представникы лемківской меншыны прилучыли ся до протесту.

Лемкы солідарны з німецком меншыном

«Над розвязаньом думали сме з комісийом уж од долшого часу. Консулютували сме ся з правниками і рішыли, што не остає нам нич інче, як лем завісити спілпрацу» – скоментувал проф. Штефан Дудра, єден з представників лемківской меншыны в комісиі. «Не было інчой можливости, як лем солідаризувати ся з німецком меншыном» – додал.

Комісия спілпрацує з урядом в квестиях, што тыкают справ меншын. Члены німецкой меншыны свою участ в роботах комісиі завісили уж 1. квітня/апріля.

Згідні з Розпоряджыньом Міністра Едукациі і Наукы з дня 4. лютого/фебруара 2022 р. тыжньове чысло годин вчыня німецкого як меншынового языка має быти зменшене з трьох до єдной годины. Другым розпоряджыньом (з 10. лютого/фебруара) Міністер некорыстно змінил спосіб нарахуваня субвенциі за учеників німецкой меншыны.

«Тяжко уявити сой в демократичній правній державі ситуацию, жебы вчыня єдной меншыны проходило подля інчых принципів як дальшых меншын. Означат то ріжне трактуваня державом громадян, што находят ся в такій самій ситуациі, і веде до дискримінациі з огляду на нацийональну приналежніст громадян Польщы» – поясняют в комунікаті своє становиско члены комісиі.

Зверніня увагы медий

Подают так само, што записы розпоряджынь міністра Чарнка сут незгідны з Конституцийом ПР, законом о нацийональных і етнічных меншынах та о реґіональным языку, а тіж ратифікуваныма Польщом медженародныма конвенциями.

«Зо страны членів Спільной Комисиі є то [завішыня спілпрацы – прип. ред.] акт десперациі, цілю звернути увагу на скалю проблему, якым є правна дискримінация меншыны, особливо, што тыкат діти і молодежы» – чытаме дале в комунікаті.

«СКУтНіЕМ є тілом покликаным до діалоґу на тему політикы державы взглядом меншын. Не сполнят свойой ролі в ситуациі, коли не єст веденый реальный діалоґ в так фундаментальній квестиі як отверта правна дискримінация єдной з меншын, што єст евенементом не лем в польскій меншыновій політиці останього десятлітя, але тіж европейскій» – подают члены комісиі.

Члены комісиі рахуют, што скоро вернут до нормального функцийонуваня, о кілько уряд польской влады підойме реальны діяня ведучы до зміны правного стану, што спричынят дискримінацию німецкой меншыны.