Дальша спілпраца медже Малопольскым Воєвідством а Пряшівскым Самосправным Крайом

24. лютого/фебруара тр. в Старій Любовни стрітили ся самоурядовы власти Малопольского Воєвідства та Пряшівского Самосправного Краю. Стріча звязана была з 20. річницьом спілпрацы реґіонів. Того дня підписали тіж символичне порозумліня про дальшу спілпрацу.

В подіі участ взяли маршалок Малопольщы Вітольд Козловскій та предсідатель Пряшівского Самосправного Краю Мілян Маєрскій.

Декады спілпрацы

«Словация є барз красном державом, а Пряшівскій Самосправный Край вынятковым реґіоном. В тым символичным, особливым місци підписали сме порозумліня про спілпрацу на черговы декады. Во спілпрацы важне є гляданя той доданой вартости – синерґіі. Дякую мому приятельови Мілянови за запрошыня і можливіст підсумувати тоту 20-літню малопольско-пряшівску спілпрацу» – бесідувал маршалок Вітольд Козловскій.

Контакты медже Малопольщом а Пряшівскым Самосправным Крайом все были добры, активны і динамічны. Пряшівскій Самосправный Край єст єдным з головных заграничных парнтерів Малопольщы. «Протягом років зреализували сме вельо проєктів, м.ін. з обшыри культуры, едукациі і інфраструктуры» – додає маршалок.

Молитва о мир

Вчас подіі самоурядовы власти підняли спільне рішыня о векшым заанґажуваню реґіонів в ініциятивы в рамках спілпрацы Інтерреґ. В плянах є покликати польско-словацкы заданьовы ґрупы, котры будут занимати ся поєдныма обшырями спілпрацы. Маршалок Козловскій підкрислил, што Пряшівскій Самосправный Край то тіж добрый партнер до проєктів з обшыри культуры, едукациі, туристикы ци інфраструкуты.

Елементом стрічы была і спільна молитва о мир на Украіні в звязку з припадаючом на тот ден першом річницьом выбуху войны. Словация і Польща то державы, якы од першых днів напасти Росийской Федерациі на Украіну принимали біженців.

Фот. www.malopolska.pl