«Дансінґ» – платньом рока в конкурсі «Віртуальны Гушлі»

В другій половині марця т.р. выстартувала тогорічна едиция конкурсу «Віртуальны Гушлі» і зачало ся голосуваня інтернавтів на найліпшу фолькову платню. В плебісциті участ брали платні з фольковом, етнічном та корінном музыком, печатаны в Польщы в 2015 році. В конкурсі стартували ансамблі, выконуючы вшелеякы музычны жанры, інспіруваны традицийном музыком, од народного граня по тяжкы ґітаровы, або електронічны звукы.

До 30. квітня/апріля мож было голосувати не лем на саму музыку. Особы, даючы своі голосы, могли вказати тіж найфайнійшу окладинку презентуваных кружків. Орґанізаторы конкурсу, котрыма являт ся ґрупа любителів етнічной і фольковой музыкы, зосередженых попри фольковых порталях і інтернетовых сайтах, проводили плебісцит через сайт www.gesle.folk.pl і уж початком мая т.р. выокремили 10 платен, на котры інтернавты дали найбільше голосів. То альбомы: «Miusjik» (ґрупа Beltaine), «Šatrika» (Čači Vorba), «O» (Chłopcy kontra Basia), «Dobre duchy» (Angela Gaber + Trio), «Muzikaim» (Kapela Brodów), «Mazurki niepojęte» (Kapela Maliszów), «Święto słońca» (Kapela ze wsi Warszawa), «Requiem ludowe» (Kwadrofonik i Adam Strug), «Mniejsze zło» (Percival Shuttenbach) і «Dansing» (Tęgie chłopy). В фінальній десятці нашли ся ансамблі, котры в своій істориі часто сігали і по русиньску народну музыку. То ґрупа Анґеля Ґабер + Тріо і ґрупа Персіваль (Percival), котра выграла влонишню едицию конкурсу з платньом Слава ІІ: Пісні Східніх Славян – на ній, окрем росийскых, украіньскых і білорускых пісен, находят ся тіж 3 лемківскы.

Днес, в само полудне, орґанізаторы оголосили результаты текучой едициі плебісциту. Найбільше голосів од інтернаватів достал ансамбль Tęgie Chłopy за платню «Dansing», отримуючы 1820 пунктів, і то она остала фольковом платньом 2015 рока в конкурсі «Віртуальны Гушлі». Інтернавты выбрали тіж найфайнійшу окладинку, прикрашаючу платню «Vol. 67» ансамблю Lautari.

В тогорічній едициі «Віртуальных Гушель» брали тіж участ інчы проєкты, котры прямо тыкают лемківской народной музыкы. То платні:

• Серенча, «Ой ле лем» – четвертий альбом ґрупы з піснями зо співника Філарета Колессы з 1929 рока (записаныма в околицях Панкной, Маластова, Устя Руского), наново одкрытыма через ґорлицкій анамбль,
• «Там на горі черешенька» – награня з тереновых досліджынь професора Романа Райнфуса, веденых на Лемковині в 60. роках ХХ ст.(выдала Фундация Стара Дорога),
• А Де То Давнійше Строіло, «Хыжа» – платня молодой ґрупы з Коросна, граючой фольково-рокову музыку, оперту м.ін. о лемківску корінну творчіст.

Конкурс «Віртуальны Гушлі» орґанізуваний єст од 2004 р. Од самого початку стартували в ним лемківскы ансамблі, а і такы, котры охочо інспіруют ся русиньском музыком. За рокы 2004-2015 мож вымінити м.ін. ґрупы: Окмель, Худоба, Кычера, Черемшына, Оркєстра св. Миколая, Капеля Древутня, Серенча, Верховина, Юлия Дошна, Лемко Тавер, Персіваль, Анґеля Ґабер Тріо, Ластівочка, Гудаци, Толгаі, Сестры Бочнєвич, Відимо, Сусанна. Окрем влонишнього конкурсу, в котрым переміг Персіваль, два з них выгрывали попередні голосуваня: Черемшына (в першій едициі за платню выдану в 2003 р.) і шыроко знана Оркєстра св. Миколая за платню Гуцульскы Музыкы (едиция за 2006 р.).