В пятницю, 17. липця/юлия 2020 р., в пополудньовых годинах одкрыли видокову вежу в Чорноріках, єдным зо сел Коросняньской Руси. Хоц на верху горы од вельох років функцийонувал видоковый пункт, то в минулый вікенд можливіст додатково войти на вежу притягнула десяткы туристів.
По близко році будовы в околици давного видокового пункту в Чорноріках поставили 13-метрову вежу, з которой видно велику обшыр м.ін. середньой Лемковины. Конструкция вежы є бетонова, по части обложена каменьом, а ціліст вінчыт деревяный дах. До входу веде велика деревяна брама, а докола вежы вызначено пляц з місцями до сіджыня під задашыньом.
Найбільшом атракцийом вежы є видоковый тарас, якій находит ся на высокости коло 10 метрів, ведут до него сходы в середині будинку. З тарасу обзерати мож Стрижівско-Динівскє Погіря і Низкій Бескід. При добрій хвили видно тіж Бєщады та Татры. При вежы єст лем 10 місц до паркуваня авта, зато власти ґміны рекомендуют, жебы авта лишати на паркінґу коло церкви в Чорноріках, а до вежы іти піше.
Вежа має три плянтра. На партері і першій кондиґнациі находят ся поміщыня до вказуваня експозиций. Партер, тзв. «ґалерия під вежом», буде удоступняный до орґанізациі часовых выстав. Тепер находят ся гын образы Ренаты Пельчар. На серединным поверху є постійна експозиция фотоґрафій Томаша Оконєвского, яка представлят околиці Корчыны і Чорнорік.
Вежа одкрыта є 7 дни в тыжни в годинах од 8.00 до 20.00 (до кінця жолтня/октобра). Од 1. листопада/новембра до 31. марця вежа буде одкрыта в год. од 8.00 до 17.00. Од квітня/апріля зас выдолжат годины одкрытя.
На вежу добрі є взяти зо собом бінокль-далекосмотріня.
Фот. Даміан Кжановскій, krosno24.pl
Коментарі