Днесь буде красні, а зарань іщі красше

Самособов, же членове і представителі народностных меншын не суть єдна гомоґенна маса, котра має на вшытко такы самы погляды. Но уж лем з прінціпу, же народностны меншыны мусять і в тім найдемократічнішім режімі бойовати за свої права, бо все є што зліпшовати, бы нам дакотры діла мали быти ясны як Сонце на небі.

Словацька влада вчера на своїм выїздовім засіданю схвалила пропозіцію закона, котрым сучасне публічне телерадіо – Радіо і телевізія Словакії, змінить ся на Словацьку телевізію і радіо. Уж лем тота козметічна зміна, кедь фаховці перераховали редізайн і вшытко з тым повязане, выйде словацькых гражданів на дакілько міліонів евр.

Но лемже то бы не была тота найгірша вість. Суть той звісти Йова є в тім, же сучасна владна ґарнітура ся ани не намагать крыти то, же їй іде лем о єдно. Зробити з публічной службы державне телерадіо, котре буде мати влада на своїх нитках.

Нихто не бере сучасній коаліції, котра дістала мандат од гражданів, жебы собі рядила державу по свому. З тым суть повязаны і зміны на дакотрых позіціях, представы о тім, як бы што мало фунґовати.

А нихто не бере владі ани то, кедь не є спокійна із сучасным ґенералным директором Радія і телевізія Словакії. То, же ся моментално не дасть нияк одкликати, могла рішыти проста новелізація закона, котру бы собі схвалили, кедьже мають векшыну в парламенті.

Лемже ту уж давно не іде лем о манажмент, котрый ся не любить владі. Влада, мотівована овладнутьом публічных медій і їх транформаційов на державны служніці влады подля взору Польщі і Мадярьска, днесь просто хоче тото саме „добро“ про словацького граждана.

А жебы собі на то дала і достаточный мандат, обвинює телерадіо з необєктівности, чім подля ґарнітуры порушують ся людьскы права, а могли бы сьме продовжовати особныма атаками на дакотрых робітників той інштітуції.

Є то о то векша траґікомедія, же якраз Радіо і телевізія Словакії має довгодобо подля бадань публічного мніня найобєктівніше інформованя. А кедь ся владі не люблять неприємны вопросы, мала бы собі спомянути, же неприємны вопросы діставали і попередні влады, і якраз то свідчість о обєктівности.

Самособов, все є шанса, але то лем така мала, як же словацькы фотбалісты на світовім шампіонаті будуть першы.

Самособов, все є шанса, але то лем така мала, як же словацькы фотбалісты на світовім шампіонаті будуть першы, же закон наконець не перейде, або холем не в такій формі, як є пропонованый, парламентом.

Будьме реалісты і рахуйме з тым, же ту о пару місяців будеме мати ку владі сервілну а владов обсаджену інштітуцію. Котра буде точно така, як має подля влады быти. Хотів бы єм ся мылити, але…

На Словакії сьме вже по 1989-ім році пережыли і владу Владиміра Мечіара, коли ку подобному овладнутю в медіях дішло. Пережыли сьме то. Вшытко має свій конець. І тота комуністічна доба, котра ся виділа быти безконечна, дішла до свого кінця. А так раз прийде знова і ку зміні політічного розложіня сил, буде інша влада, а вірю, же і іншы моресы односно публічных медій.

Но што ня досправды мерзить, є тото тихо, котре іде з боку народностных меншын. Уж якбач каждый в країні, кому залежыть на слободі медій як основній цінности в демокрації, озвав ся і підпорив робітників Радія і телевізії Словакії, котры в тых днях боюють за свою новинарьску незалежность.

На посліднім засіданю Выбору про народностны меншыны сьме вєдно з колеґом і колеґыньов передложыли выголошіня ку приготовльованым змінам в телерадію, кедьже тота інштітуція має і обовязкы односно народностных меншын. А што зробили, наприклад, головно представителі мадярьской меншыны, котры вже выкшефтовали із сучаснов владов свої бенефіты?

Наперед заблоковали пряме голосованя на засіданю, пак натігали час з новым наформулованьом выголошіня, жебы наконець вызвала членка за мадярьску меншыну в процедурі per rollam членів выбору не брати участь на голосованю.

Я бы прияв, кебы ся озвали, вызвали членів голосовати проти, бо собі думають тото і гевто. Але заблоковати голосованя неучастьов, чім ся зробить неспособность приймати рішіня у выборі, є досправды штось, што бы єм іщі перед часом у народностнім выборі не чекав.

Резултат быв точно такый, якый напроґрамовала мадярьска меншына. Лем 12 голосуючіх, 13 абсолутно не голосовало, і так то, же з тых 12 аж 9 підпорило выголошіня, не было нич платне, бо не голосовала векшына выбору.

Я реално не розумію, як тоты, котры ани не взяли участь на голосованю, думають. Ці они пересвідчены о тім, же кедь ся ламлють демократічны прінціпы, їх ся то не дотулить? Же права меншын і обєктівне высыланя про меншыны буде святилище, котрого рука ґарнітуры не дотулить ся?

Народностны меншыны суть тихо, а то є хыба. А може лем плано роздумую. Може тоты, котры днесь суть тихо, досправды хотять в медіях, котры платиме, і котры мають служыти нам, не владі, чути в новинах: „Добрый день. Днесь буде красні, а зарань іщі красше. Влада ся о вшытко постарала. Конець новин. А теперь ідеме грати юбілантам.“ Може їм досправды тото старчіть.

Статя была написана як коментарь „Вступне до контроли“ лемківского радія lem.fm. Жрідло фотоґрафії: Pixabay.com.