Днес річниця народжыня Енді Варголя

Днес річниця народжыня Енді Варголя – короля поп-арту русиньского походжыня (*6. серпня 1928, Пітсбурґ – +22. лютого 1987, Ню Йорк), котрого родичы еміґрували до Зъєднаных Штатів Америкы з русиньского села Микова на Пряшівсій Руси початком ХХ ст.

Был, як на своі часы, контроверсийным, але і модерным артистом. Николи не ставлял  границ своій творчости і інспірациям. Коли переставал малювати, заберал ся за різбу, пак рысувал, а потім продукувал фільмы, выдвал ґазеты і музыкувал.

До днес Енді Варголь остає барз популярным артистом, охочо выставляным на цілым світі. Головныма інституциями, пошыряючыма памят о його особі і творчости, сут Музей Модерной Штукы в Меджелабірцях і Музей Енді Варголя в Пітсбурґу. Окрем постійных експозиций в лабірскым і пітсбуржскым музеях, лем того рока писали сме о выставах прац Варголя в краківскым Музею Сучасной Штукы МОЦАК, в культурным домі в Стропкові (тоту мож обзерати іщы до 10. серпня 2015 р.), образі св. Аполоніі в Кракові, або о фільмах, продукуваных документалістом лемківского походжыня Богданом Дзіворскым, ци споминами Павла Вархолы (старшого брата Енді) та чысленных братаниц і братанків, якы выросли попри славным артисті, котры в документальным фільмі «Стрыко Енді» представлят Ебі Вархола (правнучка Енді).

Днес рекомендуєме зазріти до статі за тым мотузком, в котрій вычысляме 59 річы о Ендім Варголи, о котрых ани можете не знати. Зазрийте тіж на сайт русиньского співака Ігоря Куцера, котрий в модерний спосіб обробил і презентує пісні, співаны Юлийом Вархолом – матірю артисты.

Фурт можете іх слухати і в нашым радию лем.фм, а при нагоді – послухайте, як здравит нас сам Ігор Куцер з Пряшова.