Днес в Соймі ПР засіданя комісиі од меншын
Вчера, т.є, 9. марця 2016 р., зачало ся 13. засіданя Сойму Польской Республикы VIII каденциі, котре буде проходило до 11. марця. Зъізд депутатів то тіж працы і засіданя вельох соймовых комісий, посеред котрых находит ся Комісия Нацийональных і Етнічных Меншын. Вчера Комісия занимала ся діянями полномічных воєводів дс. нацийональных і етнічных меншын в 2015 р. На днес (10. марця, 17.00 год.) заплянуване єст наступне засіданя, котрого темом сут дві інформациі Міністра Внутрішніх Справ і Адміністрациі:
- інформация тыкаюча реалізациі постанов Европейской карты реґіональных або меншыновых языків (тему тыкат тіж архівальна статя проф. Олены Дуць-Файфер – за тым мотузком),
- інформация на тему кампаніі, промуючой меншыновы языкы і реґіональний (кашебскій) язык (писале сме о тым гев).
Соймова Комісия Нацийональных і Етнічных Меншын текучой каденциі была основана 16. листопада/новембра 2015 р. Обшыр діяня Комісиі то проблемы культурового дідицтва нацийональных, етнічных і языковых меншын, охороны іх прав та релізация принципів рівности подля права, без огляду на етнічне або расове походжыня, ци нацийональніст.
Президию Комісиі Нацийональных і Етнічных Меншын творят: Данута Пєтрашевска (Громадяньска Плятформа) – ведуча, і троє заступців: Ришард Ґаля (незалежний, выбраний з листы німецкой меншыны), Шымон Ґіжыньскій (Право і Справедливіст) і Станіслав Гусковскій (Громадяньска Плятформа), бывший віцеміністер в Міністерстві Адміністрациі і Цифризациі, занимаючий ся справами нацийональных і етнічных меншын. Окрем Президиі, до Комісиі приналежыт 14 членів.
