Докторска дисертация Адама Шевчыка

26. марця 2018 р. на Ряшівскым Університеті проходила оборона докторской дисертациі родака Адама Шевчыка.

Оборона проходила на Выділі Біолоґічно-Рільничым РУ в Кафедрі Землезнавства, Хіміі Середовиска і Гыдролоґіі. Тема докторской роботы дра А. Шевчыка мат наголовок «Влияня рільничого діяня на выбраны властивости земель в обшыри Маґурского Нацийонального Парку (Wpływ rolniczego użytkowania na wybrane właściwośći gleb w otulinie Magurskiego Parku Narodowego)».

В двадцетминутовій презентациі А. Шевчык оповіл о веденых ним досліджынях. Пак присутны на обороні могли давати звіданя. По тій части єденадцетособова комісия пішла нарадити ся над результатом обороны. Адам Шевчык был согласно оголошений доктором.

В рамках докторской роботы др Шевчык вюл досліджыня ріжного рода земель з обшыри Маґурского Нацийонального Парку. Серед місцевости, в котрых робил поміры, находят ся і лемківскы села: Воля Цеклиньска, Перегримка, Дошниця, Мысцова, Ожынна, Вышовадка, Долге, Чорне, Воловец, Боднарка, Розділя, Вільхівец, Поляны, Котан та Святкова Велика.

Др Адам Шевчык народил ся 15. квітня/апріля 1976 р. в Сцінаві (бл. Любіна). Маґістерско-інжынєрскы студиі завершыл на Рільничій Академіі во Вроцлаві в 2002 р. (маґістерску роботу боронил в Кафедрі Землезнавства). В 2004 р. повічнали ся зо женом Анном (з дому Гончарик) в ганчівскій церкви Покровы Пресвятой Богородиці. Од товды прожыват він на Лемковині. Мают двоє діти. Його пасийом є хованя голубів. Єст презесом ґорлицкого одділіня Польского Звязку Годовлі Почтовых Голубів. Приналежыт і до Стоваришыня Руска Бурса в Ґорлицях, єдну каденцию был членом заряду РБ.

Ґратулюєме і желаме дальшых успіхів!