Голосник

Долгій вікенд уж о хвилю. В Креници туристична бранжа жде на гости

Місто, курорт та туристична бранжа в Креници рыхтуют ся приняти гости, котры приіхают на першый, по долшій перерві спричыненій епідемійом, долгій вікенд (11-14. червця/юнія).

В Креници тырвают рыхтуваня приняти гости, котры приіхают в першый по знесіню більшости рестрикций, спричененых епідемійом, долгій червцьовый вікенд. Уж в минулый вікенд в Креници явили ся толпы люди. Погода сприяла спецерам по Парку ім. М. Дукєта, Здройовым Парку. Вельо осіб зазріло на одновлену Поляну Янівка, до Солотвин, спацерували по променаді. Гости особливо захоплюют мультімедияльны фонтаны, якы выгрывают мельодиі, а по змерку емануют вельофаребным світлом.

Одкрыта уж Головна Пияльня, готелі та пенсийонаты, а тіж реставрациі ци кавярні. Діє ґондольовый вытяг на Креницку Яворину та выізд на Паркову Гору. Войти мож і до Музею Никыфора. Змодернізуваный Музей має до заоферуваня експозицию з творчістю Епіфана Дровняка та про його жытя в модерній подобі, мож гын видіти чысленны роботы і памяткы по тым лемківскым артисті.

Фонтаны, пішы або роверовы прогулькы

На першых гости жде і одновлена Поляна Янівка, называна зеленым курортным сальоном. Новый вид має стара фонтана, появила ся тіж нова, яка імітує джерело мінеральной воды. Діют і дальшы фонтаны – в Парку ім. М. Дукєта та при Старым Здройовым Домі. Мультімедияльны фонтаны грают мельодиі, а коли робит ся темно, притігают туристів богатством міняючых ся кольорів. То велика атракция курорту. Того рока, з огляду на епідемію, влучыли іх місяц пізнійше як все, значыт початком червця/юнія.

До принятя гості рыхтуют і Солотвиньскій Парк разом з солянковом інгаляторийом та видоковом вежом на Солотвинах.

На аматорів пішых вандрівок ждут туристичны пути, а любителів біциґльовых прогульок – роверовы пути: VeloKrynica яка лучыт ся з EuroVelo11 ци одданы недавно пути гірского колярства. Разом то веце як 100 км ознакуваных трас.

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Штоденньо од 11.00 год. веде lifestyle'овый проґрам «Пачісна година» , а в суботы о 9.00 год. чытат для Вас порталь. Контакт: natalia@lem.fm

Коментарі