Голосник

Друга част творіня доброго діла на лабівскым цмонтери

Занедбаны лемківскы цмонтері то нич нового. На жаль, в селах, де ніт уж автохтонных жытелів, найчастійше єст так, што неє кому ся про них старати. Жебы тото змінити, а при тым зробити просто дашто добре, волонтеры рыхтуют другій етап модернізациі єдного з найбільшых цмонтерів на західній Лемковині, в Лабовій.

По влонишніх успішных роботах, ґрупа люди доброй волі просит дальшы особы спільно заняти ся ратуваньом загыбаючых памятників на лабівскым теметові. Подібні як влони, в інтернеті оголошено збірку фондів і шыроку акцию.

Споможте, кєд можете

Хотіло бы ся, жебы часом было інакше, але, на жаль, в примірі такых ініциятив грошы то єдна з важнійшых справ. Сут они потрібны на тото, жебы придбати необхідны материялы до модернізациі нагробных памятників. Але потреба іх так само на ідло і забезпечыня подорожы і нічлігів волонтерів, котры приходят до Лабовой і з далекой чужыны.

Другій етап модернізациі цмонтеря заплянуваный єст в днях 31. серпня/авґуста до 5. вересня/септембра. Так як вачас влонишньой акциі, на портали www.zrzutka.pl тырват збірка фондів. «В вересни 2019 р. зачал ся першый етап ремотну, котрый завдякы спертю вельох осіб завершыл ся великым успіхом. Полністю змодернізували сме пят памятників, а дальшы штырі частично. Фурт є вельо до зробліня…», заявляют в інформацийным заклику.

Проєкт є реалізуваный без державной підпоры. Волонтерам треба тым разом зобрати найменьше 5 тис. зл. Покля што акцию сперло невельо осіб. Орґанізаторы єднако выціняют конечный ремонт цмонтеря на найменьше 25 тис. зл. Непрестанно, окрем фінансовой підпоры, ґрупа фурт глядат волонтерів, котры підтримали бы тоту цінну ініциятиву.

Цінна памятка культуры

Лабівскій теметів єст єдным з найбільшых цмонтерів на Лемковині, занимат близко гектар простору. Доднес захованых на ним єст вельо камінных крестів, котры за більше як сімдесят років не были нияк ремонтуваны. Більшіст з них єст міцно пошкоджена. То остатній момент, жебы ратувати материяльны памяткы з давной Лабовой.

Цмонтір находит ся недалеко муруваной грекокатолицкой церкви Покровы Пресвятой Богородиці. Лабова до ІІ світовой войны была єдным з богатшых сел в тій части Лемковині. Выходило з него вельо вызначных Русинів. Цмонтір належыт медже єден з ціннійшых памятників русиньской культуры на Сандецкій Руси.

В рамках першого етапу волонтеры выремонтували пару камінных памятників, котры найперше вымагали помочы. Про результаты можете чытати в нашій архівальній статі.

Шеруй.

О авторі

Севериян Косовскiй

Народженый на чужыні. Матуриста з лемківского языка. Завершыл юридичный факультет Вроцлавского Університету. Окрем того што гев, час-до-часу дописує до часопису Бесіда. Головный редактор Лемківского Річника. Любитель давной Лемковины. Годен годинами слуxати про втрачене лемківскє щестя. Контакт: seweryjan@lem.fm

Коментарі