Дуда з довірьом на другу каденцию. Як могли голосувати Лемкы?

Анджей Дуда выграл недільны президентскы выборы і тым самым буде справувал уряд до 2025 р. Маючы невелику перевагу голосів, переміг свого контркандидата Рафала Тжасковского. Хоц потвердили ся меньше-веце першы сондажовы результаты exit poll, такой через пару годин по закінчыню голосуваня не было певне, хто обыйме уряд Президента Польской Республикы на нову каденцию.

Протягом кампаніі перед першом туром, як і вчас остатньой кампаніі, з ріжных стран польской політичной сцены было чути голосы, што нынішні выборы были єдныма з найважнійшых в тридцетлітній істориі свобідной Польщы. Быти може як раз фреквенция (найвысша по 1989 р.) потвердила нону, креувану через політиків, тезу.

Меншына інакше як векшына

Подібні як по першій турі голосуваня, найвеце лемківскій реґіон на обшыри Лемковины, то єст обшыр ґміны Устя Рускє, голосувал інакше як сусідні ґміны, але і інакше як ґорлицкій повіт, ци мапопольскє воєвідство загальні.

В Малопольщы од років утримує ся тренд попертя для правицьовых партий, найвеце в остатніх роках для коаліциі Зъєднаной Правиці. Анджей Дуда, котрый был кандидатом як раз того блоку, на рівни цілой державы зобрал остаточно 51,03% (10 440 648 голосів), а Рафал Тжасковскій, якій был попераный через Гражданьску Коаліцию (плятфому в векшости центровых зґрупувань), отримал 48,97% (10 018 263 голосів). Прикликаны чысла вказуют, што поляризация польской соспільности ся зас потвердила, а реелекция Дуды є при невеликій перевазі над контркандидатом.

В малопольскым воєвідстві переміг очывидно урядуючый президент (59,65%), а другій з кандидатів отримал 40,35% голосів. Смотрячы дале, в ґорлицкым повіті А. Дуда значучо переміг Р. Тжасковского. Президент отримал понад 70% вшыткых одданых голосів.

На фоні повіту і більшости ґмін на його обшыри то як раз Дуда был тым, якій отримувал барз высокы нотуваня, але єдином ґміном, в котрій ріжниця в голосах одданых на нього і на претендента Тжасковского была найменьша, была як раз ґміна Устя Рускє. То найвеце лемківскій реґіон, не лем на обшыри малопольского воєвідства, але і загальні в границях довоєнной Лемковины.

Высше попертя Тжасковского

Як сме писали в статі по першій турі выборів, на обшыри ґміны Устя Рускє находило ся 10 выборчых комісий. Найбільша містила ся в Устю Рускым, дальшы по такых селах, де днес є найбільше русиньского населіня, як Ґладышів, Ждыня ци Ганчова.

В ґміні на А. Дуду заголосувало о вельо меньше выборців як в порівнаню до повіту, бо лем 58,62%. Тжасковскій достал 41,38% голосів. Коли бо возмеме до увагы, што ґміну заселят высокє чысло Лемків, можеме спібувати поставити тезу, што Лемкы радше оповіли ся за центровым кандидатом – Тжасковскым.

Цікаво розложыли ся голосы в Ґладышові. Ту як раз каждый з кандидатів достал по рівно – по 50% (по 99 голосів). В комісиі в Ждыни, до котрой долучена была і Конечна (село выключно заселене Лемками), Дуда достал 60,51%, а Тжасковскій 39,49% голосів.

Барз цікаво выглядали результаты в комісиі в Устю Рускым, де выграл вынятково Тжасковскій, отримуючы 401 голосів (51,94%). Урядуючый президент достал 371 голосів (48,06%). Перевага Тжасковского не была велика, але в тым реґіоні рідко стрічана. Окрем Устя Руского до гевсой комісиі приписаны были села Кункова (Ліщыны) і Новиця (Прислоп).

Чужына тіж поріжнена

Все легше єст провірити тенденциі голосуваня на обшыри Лемковины, коли Лемкы меньше-веце дальше жыют в компактній ґрупі. Прото барз тяжко єст провірити політичны префенренциі родаків жыючых в хоц бы в нижньошлезскым воєвідстві. Фурт в західній Польщы сут села, де Лемкы творят высокє чысло жытелів (прим. Лісєц, Михалів, Высока), ци загальні ціла ґміна Рудна, то тенденциі в порівнаню з польскым населіньом можут быти інчы, як тоты в Малопольщы.

Загальнопринятый тренд во вшыткых західніх воєвідствах є такій, што од років выборы выгрывают в них кандидаты спераны через найбільшу центрову партию – Гражданьску Плятформу. Так было і тым разом в другій турі. Хоц тогорічны выборы были вынятковы і з огляду на тото, што Тжасковскій праві все выгрывал в великых містах (незалежно од реґіону), а Дуда на селах. Што цікаве, коли посмотриме на результаты ґміны Рудна, на обшыри котрой є найбільше населіня лемківской меншыны в західній Польщы, видиме, што значну перевагу отримал Дуда (65,44% до 34,56%).

І місто Любін в тых выборах поперло радше президента Дуду як Тжасковского. Але тренд такій был од долгых років, коли бо мідьовый реґіон звязаный з компанійом KGHM все радше поперал правицьовы зґрупуваня.

фот. Facebook / Andrzej Duda