Дуляровы Братя

Кінцьом 2015 рока на лемківскым музычным рынку вказала ся нова платня, выдана Стоваришыньом Руска Бурса в Ґорлицях. Є то перша, по демо-альбомі, платня ансамблю Дуляровы Братя, якій на сцені істнує уж 10 років і є знаний не лем лемківскій публиці. Ансамбль тот, окрем камеральных концертів в клюбах, фестівальовых выступів, заграл тіж в великых польскых медиях в єдным з популярных проґрамів, котрий має на ціли промуваня неодкрытых талантів, де отримал позитивны опініі юрорів.  Лідер ансамблю, Мирослав Дзюбина – Лемко, все в свій музычний проґрам вводил народну лемківску музыку, котру анранжувал подля власных музычных смаків. Глубокій бас вокалисты і лідера ансамблю захопил навет єдну з найбарже знаных польскых музычных критиків і специялистку од емісиі голосу Ельжбєту Запендовску.

На платни, як сама єй назва вкзаує – Дуляровы братя і приятелі, окрем членів ансамблю (Мирослав Дзюбина, Ярослав Ґавор, Кжыштоф Міка і Петро Криґовскій) выступили тіж інчы заприязены з ансамбльом артисты: Єва Лучейко (спів), Войцєх Ґуліс (басова ґітара), Мирослав Боґонь (акоредон), Вартолимій Вільчек (гушлі), Лукаш Ґурскі (перкусийны інструменты) і Пшемыслав Сокул (трубка).

На кружку находиме 12 ріжных творів. Сут то співанкы з народной лемківской музыкы як тіж авторскы творы лемківскых не лем сучасных писменників і поетів. Сут то медже інчыма: Іван Русенко, Семан Мадзелян, Штефан Лукацко і Петро Мурянка, котрий в теперішнім періоді стал ся єдным з найбарже інспіруючых артистів для ріжного рода музыків, котры вводят в свій репертуар його творчіст. Петро Мурянка, як тіж Ярослав Трохановскій, сут тіж авторами музыкы до поєдных творів, якы находят ся на платни. Вшыткы співанкы сут зааранжуваны през ансамбль подля своіх концепций. Загальні переважают ритмы музыкы латіно, босса нова, але найдеме тіж гідні музыкы денс, ачий дашто в виді денсовой балады, як і свінґ. В тот спосіб платня може порываты нас до гулянкы од шаленой по деликатной плясанкы на паркєті. Мельодиі скоро впадают в уха, зато приємні буде ся іх слухало так на штоден, як і од свята.

Тішыт популяризуваня през сучасны лемкіскы ансамблі поетицкой творчости. В тот спосіб є она хытро шмуґлювана навет тым найбарже опорным на літературу Лемкам в приступній для них формі.

Мі, особисто, як фанці мужскых басів, бракнуло выразительного іпнотизуючого глубокого голосу Мирка, котрий был барже експонуваний, хоц бы і вчас концертів на жыво. Женьскій додаток в знаных нам перше версиях демо творів такых як Ой там на горі, Підманула ци Лісом лісом де голосу ужычыла Сусанна, выдатна украіньска вокалистка, котра співат тіж лемківску музыку, барже прикрасил Дуляровы аранжациі, як тоты, котры чуєме на теперішній платни.

Платня лучыт старе з новым, што вказує, же музыка не знат границ, може ся зо собом переплітувати і быти універсальном та понадчасовом.