Економічный Форум перенесеный з Крениці до Карпача

Креничане привыкли, што все на осін в іх місті проходит Економічный Форум, якій притігат фінансиєрів, політиків і бізнесменів з цілого світа. Tого рока буде інакше, о чым поінформували орґанізаторы той великой медженародной стрічы.

Рішыня про зміну локалізациі было одкладане до остатньой хвилі. Причыном перенесіня тогорічного Економічного Форуму з Крениці до Карпача є потреба максимальной безпекы гости перед коронавірусом.

З курорту до курорту

Економічный Форум каждый рік одбывал ся в Креници. «Рішыня про зміну локалізациі было тяжкє, але підняли сме го в почутю безпекы нашых гости», інформувал Зиґмунт Бердиховскій, ведучый Проґрамовой Рады Економічного Форум.

Іщы перед деякым часом орґанізаторы тогорічного Форуму бесідували, што постарают ся зо вшыткых сил, жебы традицийно подія одбывала ся в Креници. Быти може, не было бы рішыня про перенесіня імпрезы до інчого місця, кєд бы не обнятя новосандецкого повіту тзв. червеном зоном, звязаном з пошыріньом ся COVID-19. Місто Крениця то єдно з векшых скуписк люди на обшыри загороженого повіту. На кажде 10 тис. жытелів, коронавіруса потверджено уж серед більше як 12 осіб. 

Небезпека звязана з тзв. червеном зоном довела до того, што тогорічный Форум одбуде ся в інчым польскым курорті – Карпачы (нижньошлезскє воєвідство). Медженародны фінансиєры зыйдут ся в днях 8. – 10. вересня/септембра до тамтышнього Готелю Ґолембєвскій.

Орґанізаторы в офіцияльным комунікаті подали, же рішыня перенести тогорічну едицию до Карпача было потрібне, понеже не были они в силі передвидіти, як долго новосандецкій повіт буде находил ся в червеній зоні. «Динаміча ситуациі не дає нам можности передвидіти, як скоро поєдны повіты будут наново мати статус, котрый позволил орґанізувати конґрес. А тото не дозвалят нам зробити фінальне рыхтуваня інфраструктуры конференцийного центру і ставлят цілу імпрезу під знаком звіданя в плянуваній через нас даті», пояснят в комунікати Бердиховскій.

Каждого рока, товаришучом подійом до Форуму єст Фестіваль в Бігах, котрый все притігал вельох аматорів спорту з Польщы і заграниці. «Фестіваль правдоподібно остане одложеный в часі і кєд буде, то аж товды, коли зменьшыт ся чысло хворых», пише на своім фейсбуковым профілю Пьотр Рыба, бургомайстер Крениці.