Етнокадр ‒ выкадруй навет 10.000 зл

Недавно скінчыл ся конкурс пн. Забыткоманія, орґанізуваний Народовым Інститутом Забытків, до котрого мож было зголосити фільм про забыток, або про нематерияльне дідицтво. Хоц образы присылати мож было до 30. червця/юнія т.р., то на розвязаня конкурсу і оголошыня выграных треба буде ждати аж до вересня/септембра, коли одбуде ся торжественна ґаля.

Кєд бы сте не встигли з вашом реалізацийом, або хочете іщы раз провірити свій фільмовий талант, то зас єст така шанса ‒ Етнокадр. То конкурс на етноґрафічний фільм, котрий буде медиюм інформаций о культурі, традициі, або соспільных захованях. Конкурс направлений єст на особы, котры любительско занимают ся шыроко понятом фільмовом темом і котрым близкы сут проблемы достоменности, якы ґенеруют захованя та практикы, складаючы ся на індивідуальний образ даной соспільной ґрупы. Конкурсовий фільм може вказувати звыкы, обряды нацийональных або етнічных меншын, ци соспільных ґруп, або піднимати тему соспільных заховань та культуровых трансформаций і преображынь. Темом фільму може быти тіж вказаня народных творців, або – загальні – чловека як творцю культуры.

Нагороды сут высокы, іх пуля то аж 10.000 зл. Фільмы присылати можут індивідуальны особы, або колективы, але лем непрофесийоналисты. Термін высыланя – до 14. жолтня/октобра т.р. Конкурс орґанізує Реґіональний Осередок Культуры в Ченстохові при фінансовым спертю Міністерства Культуры і Народового Дідицтва в Польщы. Цілий реґулямін конкурсу найдете гев.