Федор Віцо має 70

Вчера минуло 70 років од народжіня вызначного русиньского карікатурісты Федора Віца.

Віцо ся народив 9-го новембра 1944 року в русиньскім селі Шапинець (втогдішня Чехословакія). Є знамый як карікатуріста і културно-сполоченьскый діяч на Словеньску. Вже в 60-тых роках быв єдным із вызначных політічных карікатурістів в Чехословакії і публіковав в дакілько найбівшых чеськых і словацькых ґазетах. Быв творцьом популарного серіалю Яношік, котрый много років выходив в леґендарнім словацькім гуморістічнім часописі Рогач.

Міджі Русинами є найзнамішым серіалом Федора Віца „Ілько Сова з Баюсова“. Тот русиньскый серіал карікатур зачав публіковати іщі перед револуційов у 1989 р. і Ілько выходив в тім часі в україньскій ґазеті „Нове життя“. Од 1991 р. публіковав серіал в першых поновембровых русиньскых новинках „Народны новинкы“, котрым зробив і леґендарне лоґо „НН“. Од 2004 року Ілько публіковав ся в інформачнім двотыжденнику Русинів на Словеньску „Інфо Русин“, котрый выдавать Русиньска оброда на Словеньску. Віцо сам быв од основаня той орґанізації актівным членом РОС. Серіал Віцо закінчів на переломі років 2013 – 2014.

Віцо окрім іншого выступав і во філмах, котры были повязаны з русиньсков тематіков. Мож спомянути Ладомирьскы морітаты і леґенды, Іншы світы ці Осадне.

Карікатуры Федора Віца тішять ся облюбі в многых домашніх і загранічных періодіках, співпрацовав наприклад із чеськыма новинками Lidové noviny, моменталні публікує в економічнім деннику на Словеньску Hospodárske noviny. Серіал Ілько Сова з Баюсова быв выданый і книжно в 2001 році. Книжка была русиньско-словацько-анґліцька. За свої піблікації быв нагородженый Премійов Словацького літературного фонду, Премійов міста Пряшів і вырочнов премійов Чеськой унії карікатурістів.

Віцо 20 років орґанізує в Пряшові міджінародный конкруз кресленого гумору під назвов Золота бочка, котрого головнов темов є пиво. Є єдным із бойовників, котры довгы рокы намагають ся принавернути „Русскый дом“ в Пряшові назад до рук Русинів і на їх благо.