Фірцак продовжує в румуньскім парламенті як депутат за Русинів

В неділю 1-го децембра 2024-го року проходили в Румунії парламентны вольбы. Гражданы выберали собі новых представителів Сенату і Посланецькой сеймовні – двох палат Парламенту Румунії.

Окрім 31 політічных партій і аліанцій, котры змагали ся о кресла в парламенті, на вольбах брало участь і 19 орґанізацій, котры представлюють народностны меншыны, якы жыють в Румунії, і суть офіціално признаны. Народностны меншыны мають своїх представителів якраз в Посланецькій сеймовні.

Аж 18 народностных орґанізацій притім в сеймовні могло здобити од єдного до сім мандатів.

За русиньску народностну меншыну у вольбах подало кандідачный список Културне товариство Русинів Румунії, яке є і членом Світового конґресу Русинів. За орґанізацію кандідовав Юліус Маріян Фірцак, котрый быв русиньскым депутатом і в двох попередніх періодах, далше на списку были Франціск-Оскар Ґал, Маріяна Светлана Мурешан, Кармен Светлана Бойчук, Ґабріела Хрістіна Боднарюк і Марія Бочікор.

Мандат члена парламенту за русиньску меншыну обгаїв Юліус Маріян Фірцак. „Дякуєме сердечно за довіру і підпору, яку дали сьте Културному товариству Русинів Румунії,“ написав Фірцак на сіті Facebook.

„Вдяка вашому голосованю дістали мы честь гордо репрезентовати далше русиньску народностну меншыну і мати депутата у Парламенті Румунії, сохраняти значіня, традіції і права Русинів. Мы выражаме наше анґажованя быти силным голосом, принести нашу актівну контрібуцію розвивати нашу державу – соєдинену і богату Румунію. Дякуєме за підпору і актівность! Вєдно зробиме ліпшу будучность про нас вшыткых,“ продовжовав Фірцак.

Юліус Маріян Фірцак (р. 1979) є родаком із міста Дева. Абословав штудії на Фізікалній факулті Западной універзіты в Темешварі, пак продовжовав штудовати публічну політіку і европску інтеґрацію на Націоналній універзіты політічных штудій і публічной адміністрації. Так само закончів Націоналну універзіту обороны.

Од 2016-го року є депутатом Парламенту Румунії за Русинів. В тім часі вычеряв в парламенті свого отця – Ґеорґія Фірцака, голову Културного товариства Русинів Румунії, довгорочного члена Світовой рады Русинів.

Юліус Маріян Фірцак почас свого діяня в парламенті быв секретарьом Парламентной ґрупы про народностны меншыны і членом, пізніше секретарьом, Комітету про бюджет, фінанції і банкы. Почас мандату в роках 2020 – 2024 став так само членом Шпеціалной комісії Посланецькой сеймовні і Сенату про підпору приступового процесу Румунії до Орґанізації про господарьску співпрацу і розвиток.

За офіціалныма даныма із списованя жытелів 2021-го року в Румунії жыє 834 Русинів. Хоць чісло не є велике, но за списованьом із 2022-го року їх было лем 262. У 2025-ім році в Бухаресті буде проходити засіданя Світового конґресу Русинів, котрого головным орґанізатором буде якраз Културне товариство Русинів Румунії.

Фото: FB/Юліус Маріян Фірцак.