Фома Болех: «Хотіл єм зробити дашто добре»

17. марця 2019 р. в сельскій світлици в Ждыни прошла премєра документального фільму «Така была наша доля», якій зрыхтуваный был місцевом молодежом. Думкодавцьом проєкту, якій є направленый на документуваня лемківской істориі і утырваляня памяти серед молодшых ґенераций, єст Фома Болех.

Ґратулючы успіху, звідали сме ученика ґладышівской школы про деталі тыкаючы фільму.

Томку, повідж, одкале пришла мысель на такій, а не інчый проєкт?

Хотіл єм зробити дашто добре. Даде з пят років єм о тым думал, але все якоси не выходило, хыбаль мобілізациі не было. Фільм был зрыхтуваный в рамках проєкту «Активне село». Каждый його участник мусіл выдумати, а пізнійше зреалізувати свою ініциятиву. Были ріжны можливости, а я як раз выдумал, што зреалізую фільм.

Кого мож видіти в образі «Така была наша доля»?

Сут то інтервю. З Євом Гыром з Конечной, Димитрийом Сабатовичом з Сяр (родом з Долгого) і Штефаном Дзямбом зо Ждыні. Во фільмі оповідат ся о І і ІІ Світовых Войнах, о святым Максимі, о першых Ватрах, іщы незукраінізуваных, о выселіню, о тым, што ся діяло з церквом в Конечній, што зробили з інчыма церквами, і так загальні, о інчых темах звязаных з нашом дольом.

Цілый фільм єс сам рыхтувал, ци дахто Ти помагал?

Зачну од нагрываня. Вшытко нагрывал і монтувал Петро Ротко, при інтервю помагали тіж (рыхтували сценарий, давали звіданя) Наталия Дзямба, Аня Дзямба, Павлина Дзямба, Маґда Болех (моя сестра), Клавдия Дичко і Кристиян Жолнірчык.

Задоволеный єс з премєры?

Барз. Пришло близко 60 осіб. Місц нам старчыло, але не думали сме ани о такій фреквенциі. На початок єм вшыткых привитал. Пізнійше єм зачал дякувати. Дякувал єм Рускій Бурсі, радию ЛЕМ.фм за фінансуваня. Пак єм подякувал пані Варварі Дуць за тлумачыня, поправляня блудів в текстах. Подякувал єм тіж пані Директор Основной Школы в Ґладышові ім. Александры Вислоцкой, Кристині Михаляк, пак іщы Петрови і – же так повім – екіпі, яка помагала. Была тіж выстава старых знимок, яку сфінсувало Обєднаня Лемків.

Пристуны были маляр Штефан Телеп зо женом, шолтыс Конечной – Петро Болдысь, як тіж выступуючый во фільмі Димитрий Сабатович.

Якы маш пляны на будуче?

Но, думам іщы штоси інче награти! Не мам, покля што, ниякых думок, жебы тот фільм іщы деси вказувати. Коли нас дахто запросит – то очывидно! А так жебы тепер плянувати, то іщы ніт.

Мате може в плянах, жебы фільм дати до Інтернету?

Як продаме вшыткы платні – то як найбарже. Сут доступны платні з фільмом, в ціні по 20 зл. Мож ся до ня зголосити, або до Петра Ротка, Наталиі Дзямбы, а тіж до Клавдиі Дичко. Мож іх найти на Фейсбуку.