Формат З реґіонів до світа має помочі і Пряшівскому краю

Підпора бізнісовой сферы, співпраца із загранічом а розвиток словацького експорту. То головный мотів події З реґіонів до світа, з котров Міністерство загранічных діл і европскых справ Словацькой републікы пришло на два дні до Пряшівского самосправного краю (ПСК).

ПСК є по Нітряньскім і Тырнавскім высшім теріторіалнім цілку третім за порядком, котрый є в рамках ініціатівы резорту діпломації зарахованый до формату ціклічных подій З реґіонів до світа. Цільом є підпорити словацькый експорт і помочі домашнім фірмам просадити ся в загранічу.

Представителі веце державных резортів, самосправы і публічного сектора в повязаню з тым діскутовали в понедільок 25-го апріля в Пряшові в рамках округлого стола з малыма і середніма подникателями, але і представителями академічной общіны а безпрофітового сектора.

„Наша актівность є заміряна на економічну діпломацію і маєме як резорт намагу одкрывати двері і приходити з пропозіціями до окремых реґіонів Словакії, де хочеме помочі комуніковати головно з малыма, середніма подникателями і мікрофірмами,“ повіла Інґрід Броцкова, державный секретарь Міністерства загранічных діл і европскых справ Словацькой републікы.

Як далше повіла, єдночасно хоче резорт діпломації творити можливости і принагоды в загранічу. Не резорті за їй словами мають добры інштрументы, жебы посилнити бізніс і в рамках амбасад в 68 країнах світа знають інтеґровати і розвивати співпрацу а партнерство.

В Пряшівскім краю подля Броцковой резорт одкрывать і далшы темы. „Є то і коронакріза, так само ромска проблематіка а конфлікт на Україні, кедьже ПСК є на граніці з Українов і мусить бороти ся з величезным тиском біженців.“

„Тота подія про Пряшівскый самосправный край барз вызначна. Іде історічно о першый такый формат, де стрітили ся представителі резорту з крайом і далшыма представителями освітніх інштітуцій, але головно бізнісовой сферы, котра у нас ґенерує робочі місця. Покля буде співпрацовати державна справа, реґіонална справа і містна самосправа, сьме на найліпшій пути, жебы сьме над проблемами, котры нас траплять, перемогли,“ повів пряшівскый жупан Мілан Маєрьскый.

Як далше доповнив председа ПСК Маєрьскый, Пряшівскый край є єдным із тых, котры мають найвеце навщівників, кедьже на теріторії краю суть Высокы Татры, Полонины, много далшых природных і културных крас. Зато подля жупана край залужыть собі творіня робочіх місць, жебы ся одкрыли браны краю про загранічных турістів і тоту красу подарило ся „вывезти“ до заграніча.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА