Понад 55 тісяч евр – то сума, котра была вызберана в рамках міморядной збіркы, котру в половині авґуста выголосилв пряшівскый ґрекокатолицькый архієпіскоп і метрополіта Йоан Бабяк. Збірка проходила 30-го авґуста у вшыткых ґрекокатолицькых парохіях цілой Ґрекокатолицькой метрополітной церкви sui iuris на Словакії.
В середу 14-го октобра о тім інформовав Михал Павлишіновіч з Інформачного центру Пряшівского архіепіскопства. В Пряшівскій архієпархії ся вызберало 40 500 евр, у парохіях Кошыцькой єпархії то была сума 9 759 евр, і віруючі Братіславской єпархії вызберали 5 090, 67 евр. Довєдна сума представлює 55 349,67 евр.
Як ся пише у пресовій справі, ціла вызберана сума была в тых днях послана на банкове конто Патріархату мелкітьской ґрекокатолицькой церькви, котру веде патріарха Юссеф Абсі. Єдночасно было загнане і супроводне писмо, в котрім быв высловленый і замір єрархів Ґрекокатолицькой церькви на Словакії, жебы ся збірка перерозділила меджі вшыткы штири восточны католицькы патріархаты, котры діють в Бейруті.
В Лібаноні діє веце восточных католицькых церьквей і в Бейруті є центер трьох патріархатів. Найвекша є Маронітьска церьков, далше Сірійска католицька церьков і третьов патріархалнов церьквов є Армяньска церьков. Другу найвекшу кількость віруючіх в Лібаноні має Мелкітьска ґрекокатолицька церьков на чолі котрой є патріарха Юссеф Абсі. Тот має резіденцію в сірійскім Дамаску, но почас рока вецераз стримує ся і в резіденції в Бейруті.
В лібаноньскій столиці Бейрут велика експлозія, котра одбыла ся 4-го авґуста того року, приготовила о жывот понад 170 людей, тісячі были зранены і понад 300 тісяч людей зістало без стріхы над головов. Волна тиску по експлозії пошкодила веце катедралных соборів і храмів, так само знефункчнила три з пятьох великых шпыталів у Бейруті.
Такой по нещастній дії свою соналежность з лібаноньскыма віруючіма выразлили і єрархове Ґрекокатолицькой церькви на Словакії. „Молю ся за жертвы того нещастя і за їх родины, так само за вшыткых зраненых, ці людей, котры пришли о своє обыстя,“ написав втогды у писмі патріархови Юссефови Абсі архієпіскоп Бабяк.
ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА
Коментарі