Грекокатолицкы упамятніня в Креници

Як сме вчера інформували, православна перемышльско-ґорлицка єпархія провела упамятніня 70. річниці акциі «Вісла». Так само, в послідню суботу, 29. квітня/апріля т.р., вчас коли проходили і лемківскы упамятніня злочыну выгнаня (Лемкы 1947-2017), декaнальны упамятніня провюл краківско-креницкій деканат перемышльско-варшавской архієпархіі УГКЦ. Подіі прошли в церкви свв. Апостолів Петра і Павла в Креници.

Божественну Літургію очелил емеритуваний архієпископ і митрополита перемышльско-варшавскій Йоан Мартиняк. Дальше была служена панихіда за жертвы выгнаня. Окрем священників місцевого деканату, в богослужынях взляли участ о. Яків Мадзелян з Украіны та o. Йоан Міндяш з Пряшівской Руси, якій є спілпомічным священником в селі Якубяны. По богослужынях концерт дал хор грекокатолицкой парохіі з Кракова.

Хоц акция «Вісла» зачала ся кінцьом квітня/апріля 1947 рока, протягом 2017 рока пройдут і дальшы упамятніня, так світскы, як і церковны – в інчых єпархіях православной і грекокатолицкой Церков.