ХII Стріча Любителів Низкого Бескіду

Вшыткы любителі Низкого Бескіду та порталю beskid-niski.pl уж 12. раз будут мати нагоду зыйти ся і спільні провести інтересуючий вікенд на Лемковині. В днях. 18.-20. листопада/новембра в Ждыни буде проходила ХIІ Стріча Любителів Низкого Бескіду.

Явил ся детальний проґрам тогорічной едициі і, як все, заповідат ся цікаві і атракцийні. Перший ден стрічы то уж традицийні – показ фільмів повязаных з Низкым Бескідом. Того рока заплянувано презентацию такых фільмів як: Реформация, Істория грецкого католика з Барвінка і Православя та тылявска схізма.

Другій ден стрічы зачне ся подля выробленой уж схемы – прогульком. Трасом долгости коло 15 км вандрівничий пут буде вюл од перевалу Бескідок, на воєнний цмонтір 46, пак схід в долину Рікы Рєцка, дале через воєнний цмонтір в Бехерові, Плесканку і Ондавскы Горбкы назад на перевал Дуява.

Дальша част стрічы то прелекциі і сляйдовиска. Пополудньовий цикль прелекций зачне Яцек Кoщан, якій бесідувал буде про дукляньскых Жыдів, вказаний буде тіж фільм пн. Чом? Шымон Моджеєвскій розповіст о 30 роках діяльности Неформальной Ґрупы Камінярів Маґурич та Стоваришыня Маґурич. Про неістнуючу желізницю впілперек Низкого Бескіду: проєкт получыня Ясло-Бардиів оповіст Томаш Махновскі. Данєль Новак бесідувал буде про місто Змигород в світлі йосифиньской метрикы, Павел Кнуровскій про штурмову ізду на Львів 1. німецкой Гірской Дивізиі, а наконец – Даміан Новак представит історичний нарис парохіі в Радоцині.

Окрeм выміненых, додатковом атракцийом будут лжычкарскы варштаты, ведены народным ремісником Кжыштофом Родаком. Дерево і нарядя будут забезпечены, а хто буде охочий, тот буде міг самому зробити лжыцю. Цілий дохід з варштатів переданий буде на орґанізацию робіт на цмонтери в опустошеным лемківскым селі Незнайова. Тридньовій стрічы буде товаришыл тіж ярмак.

Для охочых взяти участ конечна єст скорша резервация місц – орґанізаторы просят высылати зголошыня на адрес spotkanie@beskid-niski.pl, а орґанізацийны дрібниці найдете за тым мотузком.

Сайт beskid-niski.pl то вадемекум знаня про Низкій Бескід. Найдете на ним вельо інформаций про самы горы – поміщены сут там детальны мапы – доступны он-ляйн, описаны гірскы пасма Низкого Бескіду: Ганчівскы Горы, Пасмо Буковиці, Ґрибівскы Горы, Дукляньскій Бескід, Маґурскє Пасмо і річний басен выжньой Вислокы. Найдете ріжны пропозициі туристичных пішых прогульок, вельо придатных інформаций, як напр. листу туристичных колиб з адресами і телефонами, студентскых хыжок, аґротуристичных ґаздівок, выпочынковых осередків, хыжок до нанятя, ци готелів. В табели обєктів вычыслено і описано ци то ріжного рода забыткы, ци місця, котры часом треба схоснувати вчас туристикы (напр. аптыкы, банкоматы ітп.). На окремій листі поміщено детальний історичний опис – враз зо знимками (часто архівальныма) – вшыткых місцевости Низкого Бескіду. Схарактеризуваны были десяткы воєнных цмонтерів і більше як 150 істнуючых і неістнуючых церкви. Велику част змісту сайту beskid-niski.pl занимают дописы про Лемків і Лемковину. Сут то статі на історичны, реліґійны темы, спомины, оповіданя, біоґрафіі, соспільна діялніст і вельо інчых. Окрем част сайту то характеристыка природы Низкого Бескіду. Почытати там мож і про Маґурскій Нацийональний Парк, Яслискій Краєвидний Парк, зоны хороненого краєвиду, резерваты, про тото якы звірята жыют на обшыри НБ і што гын росне. Част сайту то типово туристичны інформациі – порады для каждого, хто перший раз выберат ся в горы – звязаны з погодом, комунікацийом на місци, роверовыма трасами, ци базом місц, де мож тішыти ся зимовыма спортами. Сайт beskid-niski.pl то тіж чысленны фотоґалериі з тематичныма ґалериями і колекциями архівальных знимок і інчыма. Придатным при перезераню величезного змісту сайту може быти мапа порталю, але і она не помістила вшыткого, што мож там найти.