Горонь: Меншыновый фонд зістане захованый

Окремый Фонд на підпору културы народностных меншын зістане захованый. Інформовав о тім в понедільок 5-го фебруара 2024-го року уповномоченый влады Словацькой републікы про народностны меншыны Акош Горонь на своїм офіціалнім профілі на сіті Facebook.

Міністерка културы Мартіна Шімковічова на четверьговім засіданю влады (1-го фебруара, позн. ред.) зняла з леґіслатівного плану пропозіцію на злучіня фондів,“ написав уповномоченый.

Припоминаме, же словацька влада в децембрі минувшого року публіковала План леґіслатівных задач влады СР на рік 2024, в котрім ся раховало із злучіньом Фонду на підпору културы народностных меншын із Фондом на підпору уменя, чім бы ся створив новый Фонд на підпору културы.

Проти того озвали ся представителі меншын, была списана громадна припомінка, а проти такого злучіня высловив ся і уповномоченый Акош Горонь.

„Почас мого куртого урядованя єм зреалізовав із дотуленыма дакілько стріч, чого цільом было скапчати силы про сохраніня фонду. Такой по новім році написав єм писмо пані міністерці, высловив єм незгоду із злучіньом фондів, а ініціовав єм голосованя меншынового выбору, в котрім меншыны узнесіньом одшмарили пропозіцію злучіня, і жадали зміну леґіслатівного плану,“ написав далше меншыновый уповномоченый.

„Наслідно єм узнесіня передложыв і на Раду влады Словацькой републікы про людьскы права, народностны меншыны і родову рівность, котра стотожнила ся з голосованьом выбору. Завершіньом цілого процесу была особна стріча з міністерков културы у премєра, на котрій сьме ся добісідовали на зрушіню той задачі,“ інформовав Горонь.

Уповномоченый влады Словацькой републікы подяковав вшыткым, котры підписали петіцію за захованя фонду, так само членам Выбору про народностны меншыы і етнічны ґрупы, але і председови партії Magyar Szövetség – Мадярьска аліанція, Крістіанови Форро, котрый подля Гороня одкрыв тоту тему на стрічі з премєром.

Подяковав і представителям Міністерства културы Словацькой републікы „за конштруктівный діалоґ і выслуханя пожадавок меншын“.

„Продовжуєме в роботі і будеме сполупрацовати на новелізації закона так, жебы быв Фонд на підпору културы народностных меншын пружнішый, і жебы працовав про векшу спокійность народностных меншын. То задача, котра нас теперь чекать. КУЛТМІНОР-у теперь ‘грозить’ уж лем єдна справа: буде мусити працовати ефектівніше,“ закінчів уповномоченый Горонь.