Хтіли купити ліс, жебы оддати му свободу, выпередило іх надлісництво

Кінцьом листопада/новембра минулого рока публикували сме інтервю з супружеством Мєшком і Каролином Станіславскыма, котры зорґанізували інтернетову колекту грошы. Хтіли выкупити кавальчык ліса коло Мысцовой і, як то окрислили, «оддати му свободу». Не повело ся. Выпередило іх Надлісництво Дукля, хоснуючы право до першенства купити ліс.

Станіславскы хотіли купити більше як 5 гектарів ліса (на початок) недалеко Маґурского Нацийонального Парку і переформувати го з ґаздівского ліса, постеріганого як місце, з якого ся бере дерево, в свого рода резерват, де мож бы в спокою пережывати натуру. «Ліс нашли сме в простый спосіб, перезераючы оголошыня в сіти. Так трафили сме на місце, котре вказало ся інтересуюче, бо находит ся на обшыри цілого великого лісового комплексу [Карпатской Пущы – прип. ред.]. Бывают гын і медвід, волк, літают крикуны, совы. Тот ліс жыє» – бесідувал Мєшко.

Люде не пожалували ґроша

Плян был, жебы на обшыри Свобідного Ліса нияк не вытинати дерева і не полювати. Станіславскы хотіли гын вести занятя в рамках свойой ініциятивы «Бытя в Лісі», то занятя з еколоґіі та контемпляцийны одособніня. Жебы выкупити ліс, потрібували коло 139 тис. зл. Зорґанізували інтернетову збірку. Повело ся зобрати більше як плянували, бо веце як 150 тис. зл.

Ліс належал до приватной особы. Коли умова закупу была уж практичні сфіналізувана, одозвало ся Надлісництво Дукля. Схоснували право першенства купити ліс на іх обшыри.

Плянуваны господарчы діяня на обшыри ліса

Процес купуваня ліса складат ся з двох етапів. Найперше підписує ся вступный умовный договор і вплачат част грошы. Пак договор іде до надлісництва, якє діє на даній обшыри. Надлісничы мают місяц на рішыня, ци схоснуют право першенства купити дану обшыр, ци ніт. «Два дни перед кінцьом того терміну надлісничый з Дуклі пришол до нотария і освідчыл, же реалізує право першенства купити тот ліс. А мы уж праві сме зачали святкувати» – бесідує Мєшко.

Збіґнєв Жывєц, надлісничый з Надлісництва Дукля, бесідує, што причыном выкупліня ліса сут плянуваны господарчы діяня на тій обшыри. О колекті на Свобідный Ліс чул, але підтримує, што скорше не знал, што іде о тоту конкретну ділянку. Дознал ся з нотарияльного акту. «По тым, як надлісництво купит ліс, буде він не лем свобідный, але і доступный для каждого» – додає лісничый.

«Інформация тота была для нас великым шоком і выкликала вельо емоций» – повіл Мєшко. Станіславскы одзыскали част грошы, котры вплатили в рамках першой раты. Тепер глядают нове місце, в котрым будут мочы створити вымрияный Свобідный Ліс.

Фот. Ґб Бытя в лісі