Климківка неодолга зачне притігати іщы більше аматорів водных спортів і одпочываня над водом. Протягом того і наступного років берегы озера ся змінят. Будут барже атракцийны, а певністю выгіднійшы і безпечнійшы.
Тырвают роботы над поправом кондициі берегів озера в Климківці, головні для зліпшыня туристичной оферты. Діє ся так за справом великого проґраму реалізуваного через ґміны Ропа, Устя Рускє, Санкова та ґорлицкій повіт.
Безпечны берегы
Того рока ґміна Ропа зачала роботы звязаны з поправом фунґуваня берегів Климківкы. Поділено іх на два етапы. Першый то реґуляция і профілюваня берегів озера. Буде зрыхтуваных 145 метрів забезпеченого набережа разом зо сходами, котрыма буде мож зыйти до воды.
Набереже буде складало ся з трьох терас, якы зроблены будут з каміня та композитовых плит. Буде то основа для прац, якы плянує ся реалізувати в будучым році. Разом роботы коштувати будут ґміну близко 3,5 млн зл.
На цілій долгости озера, за котру одповідат ґміна, зроблят біциґльову стежку, яка в штырьох місцях получена буде зо стежком реалізуваном староством, а тота вела буде од Дому Социяльной Опікы в Климківці аж до стадіону в Устю. Кошт той пішо-біциґльовой дорогы то більше як 4 млн зл. В зимі хоснувана буде як лыжный пут.
Місця для одпочынку
Любителі сонця уж од будучого рока будут мочы выбрати єдну з 15 компактовых пляж. Будут то фраґменты набережа вкрыты вытрималым на атмосферичны умовы мягкым материялом, якій одділит пляжників од каменистого берега.
Зрыхтуют і задашену обшыр до ґрілюваня, яка буде мала 91 квадратовых метрів, будут гын і санітарияты, доступ до біжучой воды. Попри зроблят пакрінґ та великє стережене місце, де можна буде ся купати, та плятформу до водуваня яхтів.
Фот. горі. zalewklimkowka.pl
Коментарі