Клокочівска Богородіця буде выголошена за Покровительку Земпліна

У четверь 25-го марца 2021-го року, на праздник Благовіщенія Пресвятой Богородіці, буде у вшыткых храмах Ґрекокатолицькой церькви на Словакії прочітаный дектрет Конґреґації про Восточны церькви в Римі.

Декретом Клокочівска Богородіця выголосить ся за Покровительку Земпліна. Так само до літурґічного календаря ґрекокатоликів на Словакії дістане ся новый праздник з назвов Память чудотворной Клокочівской іконы Пресвятой Богородіці, Покровителькы Земпліна. Інфомовав о тім Пресовый центер Кошыцькой єпархії (TSKE).

Ініціатіва підпорена і римокатолицькым а православным єпіскопом

Зо жадостьов о выголошіня Пресвятой Богородіці з Клокочова за Покровительку Земпліна, і зо жадостьов о выголошіня праздника звернула ся на Конґреґацію про Восточны церькви в Римі іщі минувшый рік Рада єрархів Ґрекокатолицькой церькви на Словакії.

„Зробила так підпорена жадостями пріматорів і містьскых заступительств вышнього і нижнього Земпліна, як і підпорныма писмами Монс. Бернарда Бобера, кошыцького римокатолицького архієпіскопа-метрополіты, і владыкы Ґеорґія Страньского, православного архієпіскопа михалівско-кошыцького з нагоды празднованя 350-ой річніці чудесного слызыня іконы Пресвятой Богородіці в Колокочові,“ інформує пресовый центер.

Святкованя ся перенесли

O публікованю декрету вырішыла Рада єрархів Ґрекокатолицькой церькви на Словакії на своїм остатнім засіданю у фебруару того року.

„Наперед мав быти декрет о Покровительці Земпліна выголошеный почас децембровой навщівы державного секретаря Святого Престола кардінала Пєтра Пароліна на Словакії, котра была з причіны його особных здравотных проблем і пандемічной сітуації перенесена на іншый, затля нестановленый термін. З причіны протипандемічных огранічінь была перенесена о рік і путь з юбілуючов Клокочівсков іконов до Рима, котру Папа римскый Франціск прийме у Ватікані 29-го юна 2021-го року на праздник свв. Петра і Павла.“

Як далше інформує Кошыцька єпархія, на котрой теріторії є і Клокочів, єдночасно были на третю тогорічну авґустову неділю перенесены і головны святкованя Юбілейного року 350-ой річніці слызыня іконы.

Вызначный путницькый центер

Клокочів належыть меджі найвызначнішы маріяньскы путницькы місця выходной Словакії, передовшыткым Земпліна. В Ґрекокатолицькім храмі Успенія Пресвятой Богородіці находить ся єдна із найчестованішых ікон Божой Матери, котрой оріґінал слызыв у 1670-ом році.

„В політічнім, соціалнім і реліґійнім хаосі 17-го столітя, переважно на теріторії выходного Угорьска, на теріторії втогдышньой Мукачівской єпархії, якраз в Клокочові першый раз появлює ся феномен слызыня ікон Пресвятой Богородіці. Почас слідуючіх декад тот яв повторяв ся і на іншых маріяньскых іконах в далшых ґрекокатолицькых храмах деншньой Словакії, Закарпатьской области Україны, северовыходного Мадярьска і северной Румунії.“

В Колокочові днесь не є оріґінал іконы, котра слызыла. То, де є днесь орґінал іконы і їй перша копія, ся не знать. Клокочівска Богородіця все была меджі людми признавана за Покровительку і стала інтеґралнов частьов духовной дідовизны выходной Словакії. Доднесь їй одказ є жывый меджі ґрекокатоликами, римокатоликами і православныма.

Фото: Давід Ковач, TSKE.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА