Лавреатами Премії ім. Антонія Годинкы стали Василь Бойчук і Ласло Пушкаш

16-го юла 2021-го року одбыла ся в Будапешті традічна научна конференція присвячена памяти академіка Антонія Годинкы. В рамках конференції одбыло ся і передаваня Премії імени Антонія Годинкы за 2021-ый рік.

Орґанізаторами події были Вседержавне общество русиньской інтеліґенції імени Антонія Годинкы, Столичне русиньске націоналне самосправованя і Русиньскы самосправованя VI. a VIII. району Будапешті.

Конференцію одкрыв Штефан Лявинець, председа Світового конґресу Русинів. Участь брали і Ґеорґій Фірцак, член Світовой рады Русинів за Румунію, а Мартін Караш, председа Русиньской оброды на Словеньску, котрый у Світовій раді сидить за Словакію.

Лавреатами Премії імени Антонія Годинкы за 2021-ый рік стали ґрекокатолицькый священик і довгорічный член Світового конґресу Русинів з Румунії отець Василь Бойчук, і ґрекокатолицькый священик, малярь, родак з Ужгорода, отець Ласло Пушкаш. Пушкаш є окрім іншого і автором книжкы Кир Теодор Ромжа. Життя і смерть єпископа.

Участны могли на конференції выслухати пять лекцій. Ласло Годинка бісідовав о споминах на свого діда Антонія Годинку. Творчость свого отця – маляря і теолоґа Ласла Пушкаша, представила його дівка проф. Бернадетт Пушкаш, котра діє на універзіті в Ніредьгазі.

Далшыма, котры чітали лекції на тему Антонія Годинкы, были Др. Йожеф Ботлик і Йожеф Балоґ. З позначков выступив і лавреат тогорічной премії, отець Василь Бойчук, котрый бысідовав на тему Русины і віра в Бога.

Як інфомровав председа Русиньской оброды на Словеньску Мартін Караш, на події в Будапешті доїднали ся і участници русиньского меджінародного вытварного пленера, котрый є напланованый тот рік в Бардейовскых купелях. Так само наплановала ся на Словакії і выставка русиньского маляря жыючого в Мадярьску – Андрія Манайла.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА