Лавреаты тогорічного плебісциту «Великє Одкрываня Малопольщы»

В серпни/авґусті т.р., інформували сме на нашым портали, же выстартувало голосуваня в плебісциті «Великє Одкрываня Малопольщы». Тепер приносиме віст про закінчыня голосувань та нагордожыню лавреатів, котры отримали в поєдных катеґориях найбільше голосів. Самособом, головна нагорода 50.000 золотых трафила до міста Ґорлиці, котре тым способом остало ґаздом плебісциту в будучым році.

Ґаля розданя нагорід проходила в понедільок 3. жолтня/октобра 2016 р. в селі Санкова. Місто Ґорлиці, в котрым находит ся і русиньска Руска Бурса та першы професийональны медиі ЛЕМ.фм, репрезентувал бургомайстер міста Рафал Кукля, на котрого рукы зложено чек з признаном квотом. Інчы были нагороджены за катеґориі Особливе місце, Туритстична Атракция, Подія, Смачні і з традицийом, В гостині, Хыжа з климатом, та Туристичний провідник.

В плебісциті, котрий проходит на обшыри Малопольщы, натуральным од парох років є і тото, же номінуваны до него сут і туристичны атракциі, місця, подіі, ци люде, котры шырше, або узше сут повязаны з середньо-західньом частю Лемковины, котра днес находит ся м.ін. в границях малопольского воєвідства. Того рока номінуваны з Лемковины были грекокатолицка церков св. Михала з русиньского села Білична, міста: Ґорлиці, Крениця, та села Маластів і Шымбарк (лемківска част села зове ся Долины). За катеґорию Подіі номінацию отримали Фестіваль ім. Яна Кєпуры в Креници, Фестіваль Музыка Заклята в Дереві, Пленеровы оперы в Реґєтові та Свято Діти Гір в Новым Санчы. Послідньом катеґорийом, в котрій мож глядати лемківского акценту была катеґория Смачні і з традицийом. В ній то номінуваны ныли Лемківска корчма в Креници і Корчма «Гуцулянка» в Реґєтові. Окрем выже выміненых катеґорій, мож было дати голос на поєдны готелі і аґротуристикы, котры находят ся в лемківскых місцевостях. В катеґориі Туристичний провідник єдным з номінуваных был опікун церкви св. Параскєвы в Квятони – Ян Гыра. Голосы мож было посылати до 6. вересня/септембра т.р.

фот. горі: бургомайстер Ґорлиц – Рафал Кукля одберат признану нагороду; джерело: фанпейдж Малопольской Туристичной Орґанізациі.