Лем.фм ПОДКАСТ – соткы годин лемківской бесіды на заклик

Лем.фм з гордістю презентує інновацийний систем, котрий пошырює функцийоналніст нашой медияльной ґрупы.

Сотворили сме для вас модерний архів, котрий зве ся базом ПОДКАСТІВ. За мотузком podcast.lem.fm (або podkasty.lem.fm i archiw.lem.fm) мож перезерати поєдны одтинкы. На ПОДКАСТЫ можете войти тіж з мeні нашого сайту лем.фм. В ПОДКАСТАХ будут актуальны премєровы авдициі радия лем.фм, а з часом пошыриме іх о наш обшырний архів, в котрым є уж більше як 3000 проґрамів (на днес 3065 і чысленны годины высыланя нажыво, котрого ту не рахуєме, але даколи тіж в подкастах будеме заміщати).

ПОДКАСТ.ЛЕМ.ФМ фунґує в опертю о плятформу mixcloud.com, зато авторскы права артистів і творців сут полністю респектуваны. Співанкы, котры хоснуєме, описуєме подля окладинок, а коли сут они в базі www.discogs.com, або gracenote.com (котра єст тіж базом для м.ін. amazon, sony, wimp, mtv, deezer), то на сторонах подкастів вкаже ся окладинка єдного з артистів авдициі. Прото заохочуєме до додаваня русиньской творчости до www.discogs.com. Тото позволит нам ліпше діяти, збільшыти професийональніст нашых медиів, а фінальні отворит дорогу до выплачыня вынагороджынь за авторскы права.

Заходте і хоснуйте – най ся Вам любит!