Лемківскій фольк-рок в Новым Санчы

В неділю, 4. вересня/септембра т.р., Сандецкій Штетль просит на чергову стрічу з циклю Лемківскы Дорогы – проходячий рік Фундациі Номіна Розе, в рамках котрой діє Сандецкій Штетль, рішыла посвятити лемківскій меншыні, в звязку з чым орґанізує деякы імпрезы з Лемками в головній роли.

Тым разом стріча посвячена буде лемківскій музыці. В єдным з локалів, якій находит ся при сандецкых плянтах, выступит капеля А Де То Давнійше Строіло. Музыка, яку грают (лемківскій фольк-рок) оперта єст на традицийных лемківкых мельодиях і співанках, а і вокалистками ґрупы сут дві Лемкыні: сестры Сабіна і Анна Романьчак. Ансамбль што раз більше концертує, а тіж мат на своім конті уж деякы фестіальовы успіхы.

Початок концерту 18.00 год., Spóźniony Słowik (ул. Длуґоша 10) в Новым Санчы.

Сандецкій Штетль то проєкт реалізуваний Фундацийом Номіна Розе, якого цілю єст приближаня жытелям сандецкой землі культуры, реліґіі та істориі Жыдів. В рамках своіх діянь хотят вказати материяльний і духовий вклад жыдівскых жытелів в розвиток Нового Санча. Окрем того, Сандецкій Штетль то тіж істория і традиция інчых нацийональных і реліґійных меншын, якы замешкували сандецку землю: Лемків, Ромів, ци протестантскых спільнот.

Вчас першой стрічы пн. Лемкы вчера і днес Барбара Балус з Польского Туристично-Краєзнавчого Товариства Новий Санч (ПТКТ) оповідала про давных сандецкых Лемків. В другій части запрошены гості: Юлия Дошна (лемківска піснярка), Петро Дроздзік (фотоґраф), Ганя Фурман бесідували на тему лемківской сучасности. Ціліст вюл Лукаш Поломскій з Сандецкого Штетля. Реляцию з той подіі найдете в 11. но «Панрусинського Тыжденника ЛЕМ.фм+»

На наступну запрошено др Антония Крога – писменника, етнолоґа, музейника і тлумача, якій бесідувал про Акцию Вісла на Лемковині. На антені радия ЛЕМ.фм емітувана была реляция зо стрічы.

Ґрафіка горі: Гудакы ідут грати на весіля 1959 р., Іван Русенко.