«Лемківскє Літо 2016» в Чмели

В суботу, 16. липця/юлия т.р., в селі Чмель на чужыні одбуде ся циклична уж подія пн. «Лемківскє Літо 2016». Є то стріча орґанізувана Православном Парохійом Св. Тройці в Любіні, а партнерує ій село Чмель та Уряд Міста Хоцянів.

Влонишня едиция «Лемківского Літа» проходила дакус пізнійше, бо кінцьом серпня, што такой мож было брати як пращаня літа. Но, тот раз чмельска стріча буде проходила такой одраз по Петрівці – якбач початком літа, котре подля астрономічного каледнаря зачало ся 21. червця/юнія і тырват до 23. вересня/септембра.

Подібні як влони, орґанізаторы зрыхтували для присутных культурний проґрам. Другій раз запоряд подію прикрасит выступліня фольковой ґрупы 7кропка. Тогорічна едиция буде збогачена вокально-рецитаторскым выступом наймолодшых отрочат з предшкільной ґрупы лемківского языка, котра ведена єст при Публичным Предшколи но. 7 в Пшемкові.

Попри тым, «Лемківскє Літо 2016» то нагода до стрічы з рідныма краянами. Село Чмель доднес являт ся сильным осередком прожываня Лемків на землях выгнаня. По 1947 році до села і його околиц трафило вельох жытелів Білцаревы. Старчыт спомянути на лемківского поету Семана Мадзеляна (1922-2014), котрий більшіст свого жытя провюл в Чмели (гын є похований), ци на братів Ярослава та Петра Трохановскых, котры перед поворотом на Лемковину прожывали разом з другыма Білцарівянами в тых околицях. Про Чмель было голосно і в автобіоґрафіі Петра Трохановского А Висла дальше плыне (ціле слуховиско доступне в нашым радийовым архіві), ци в рамках печатаной Бесіды, де своє оповіданя пн. Чмель – ту останеме на долгы рокы, публикувал постепенно Лука Вожняк.

Більше інформаций про подію – на залученым долов афішы.

7кропка вчас концерту на І Фестівали Лемківской Авторской Творчости «Молода Лемковина».